Салауаттар яу батырҙары менән ғорурлана

Ватанды һаҡлаусылар көнө алдынан “Ағиҙел” мәҙәни-ял үҙәгендә уҙған тантаналы йыйылышта ҡала хакимиәте башлығы Динар Хәлилов бер төркөм һуғыш яугирҙәренә “1941-1945 йылдарҙағы Бөйөк Ватан һуғышында Еңеүҙең 75 йыллығы” миҙалын тапшырҙы. Динар Ғәли улы уларға һаулыҡ теләп, Бөйөк Еңеүгә индергән ҡаһарманлыҡтары, ҡала тормошонда, киләсәк быуынға патриотик тәрбиә биреүҙә ҡатнашыуҙары өсөн рәхмәт белдерҙе. Был көндө башлыҡ 12 кешенең күкрәгенә юбилей миҙалын таҡты.
Ветерандар хәҙер барыһы ла оло йәштә. Күпте күргән, күпте кисергән яугирҙәрҙең ҡайһы берәүҙәренең һаулыҡтары ла шәптән түгел. Шуға күрә ҡала хакимиәте башлығы һәм уның урынбаҫарҙары юбилей миҙалдарын ветерандарҙың өйҙәренә лә барып тапшыра. Хатта был көндәрҙә республиканың баш ҡалаһында хәрби госпиталдә сәләмәтлектәрен нығытыусы ветерандар ҙа иғтибарҙан ситтә ҡалманы, улар ҙа үҙ миҙалдарын ҡала хакимиәте вәкилдәре ҡулынан алып ҡыуанды. Оло йәштә булыуҙарына ҡарамаҫтан, Бөйөк Ватан һуғышы ветерандары төшөнкөлөккә бирелмәй, уларҙағы рух ныҡлығы күптәргә өлгө булырлыҡ, тип билдәләй ветерандарҙы ҡотларға барыусылар.
- Мин һәм минең коллегаларым Бөйөк Еңеүгә индергән өлөштәренә рәхмәт белдереү өсөн ҡалабыҙҙың һәр ветеранына барасаҡ. Беҙ уларҙың фашизмды еңеү генә түгел, илебеҙгә азатлыҡ һәм тыныслыҡ бүләк итеүҙәрен дә оноторға тейеш түгел. Ветерандарҙың батырлыҡтарын ҡәҙерләү - беҙҙең бурыс, - ти ҡала хакимиәте башлығы Динар Хәлилов.
Салауат ҡалаһында 59 Бөйөк Ватан һуғышында ҡатнашыусы һәм 692 тыл хеҙмәтсәне иҫәпләнә. Уларҙың барыһына ла юбилей миҙалдары тапшыраласаҡ.