Һөнәр һайлау - яуаплы

Салауат мәғариф һәм һөнәри технологиялар колледжы мәғариф идаралығы менән тығыҙ бәйләнештә эшләй һәм ҡаланың 8-9 класс уҡыусылары, уларҙың ата-әсәләре асыҡ ишектәр көнөнә саҡырылды. Улар әлеге заманда актуаль һөнәрҙәр тураһында белде, төрлө оҫталыҡ дәрестәрендә ҡатнашты.

- Йыл һайын урта һөнәри белем биреү өлкәһендә берҙәм федераль асыҡ ишектәр көнө үткәрелә. Беҙ «Профессионалитет» федераль проектының бөтә өҫтөнлөктәре, Салауат мәғариф һәм һөнәри технологиялар колледжының «Педагогика» һәм «Туризм һәм хеҙмәтләндереү өлкәһе» кластерҙары тәҡдим иткән бөтә мөмкинлектәр тураһында һөйләйбеҙ. Уҡытыусыларыбыҙ һөнәрҙәрҙең өҫтөнлөктәре, буласаҡ студенттар өйрәнәсәк предметтар, белгестәрҙең эш урынында нимә менән шөғөлләнәсәге тураһында еткерә. «Профессионалитет»та Рәсәй Федерацияһының 81 субъекты, 493 кластер, 24 тармаҡ һәм 1 470 колледж, шул иҫәптә Салауат белем биреү һәм һөнәри технологиялар колледжы ҡатнаша. Директор Зөлфиә Ишембәтова етәкселегендә етди команда эшләй. Бында эшләүебеҙ менән ғорурланабыҙ һәм бөтәһен дә колледж студенттары итеп күрергә шатбыҙ, - ти Салауат мәғариф һәм профессиональ технологиялар колледжының һөнәри йүнәлеш үҙәге етәксеһе Оксана Ерофеева.

Айырым кабинетта ата-әсәләр менән осрашыу үтте, улар үҙҙәрен ҡыҙыҡһындырған бөтә һорауҙарҙы биреп, яуаптар алды.
- Ата-әсәләр йыйылышында беҙ маҡсатлы уҡытыу, ниндәй һөнәрҙәр, эш биреүселәр, ярҙам итеүсе платформа кеүек темаларҙы тикшерҙек. Әлбиттә, ата-әсәләр менән дә осрашыу кәрәк ине. Беҙ колледжда уҡытылған бөтә һөнәрҙәр тураһында һөйләнек: «Хоҡуҡ һаҡлау эшмәкәрлеге», «Мәктәпкәсә белем биреү», «Башланғыс кластарҙа белем биреү», «Башланғыс белем биреүҙә коррекцион педагогика», «Өҫтәмә белем биреү педагогикаһы», «Мәғлүмәт системалары һәм программалау», «Сауҙа эше», «Туризм һәм ҡунаҡсыллыҡ», һаулыҡ мөмкинлектәре сикләнгән кешеләр өсөн һөнәри белем биреү ҙә бар, улар - «Электрон-иҫәпләү машиналары операторы», «Тегенсе», был һөнәрҙәргә уҡыу ваҡыты - 10 ай. Өҫтәмә һөнәри программалар бар: тәрбиәсе ярҙамсыһы, В категориялы автомобиль водителе, вожатый, суд секретары, - тип аңлата Оксана Ерофеева.

Йыйылыш аҙағында ата-әсәләр оҫтаханалар буйлап экскурсияға һәм оҫталыҡ дәрестәренә саҡырылды.
- Әлеге ваҡытта беренсе корпуста ремонт бара, сөнки беҙҙең колледж «Профессионалитет» масштаблы проектында ҡатнашты, беҙ элек «Педагогика» кластерында булдыҡ, хәҙер бөтә республика буйынса «Туризм һәм хеҙмәтләндереү өлкәһе» кластеры өсөн яуап бирәбеҙ. 1 сентябрҙән ике корпуста ла эшләрбеҙ, тип ышанабыҙ, - тип билдәләй Оксана Ерофеева. - Унда яңы бинала яңы ҡорамалдар менән туризм һәм хеҙмәтләндереү өлкәһендә студенттарҙы уҡытыуҙың яңы системаһы төҙөләсәк. Беләһегеҙме, урта һөнәри белем биреү өлкәһендә масштаблы үҙгәртеп ҡороу бара, хәҙер колледждарҙа уҡыуы бик шәп. Салауат мәғариф һәм һөнәри технологиялар колледжы ҡала йәштәренә алыҫ китмәйенсә, үҙебеҙҙә лайыҡлы белем алырға мөмкинлек бирә. «Профессионалитет» беҙгә студенттарҙы эш урындары менән тәьмин итергә ярҙам итә, сөнки был проект, тәү сиратта, эш биреүсе менән тығыҙ бәйләнеште, практик йүнәлешле программаларҙы, шунда уҡ эшкә тотонорға әҙер белгес сығарырҙы күҙ уңында тота.

- Ҡыҙым был колледжға «Хоҡуҡ һаҡлау эшмәкәрлеге» һөнәре буйынса уҡырға инергә теләй. Бөгөн беҙ күп һорауҙарыбыҙға яуап алдыҡ, барыһын да ентекләп аңлаттылар. Хәҙер имтихандарҙы уңышлы тапшырырға, ә һуңынан документтарҙы бында тапшырырға кәрәк, - ти Гөлфиә Түләбиргәнова.
Ҡаланың төрлө мәктәптәренән йыйылған 8-9 класс уҡыусылары өсөн ҡыҙыҡлы әңгәмәләр, оҫталыҡ дәрестәре ойошторолдо.

- Беҙҙең студенттар өсөн яҡшы эшкә урынлашыу мөмкинлеге бар, Эске эштәр министрлығы бүлеге һәм енәйәт-башҡарыу системаһы юғары уҡыу йорттарында маҡсатлы белем алырға тәҡдим итә, уҡыған ваҡытта яҡшы стипендия аласаҡһығыҙ һәм юғары уҡыу йортонда уҡыу ваҡыты эш стажына инәсәк. Шулай уҡ ял итеү урынына барып-ҡайтыу сығымы ҡаплана, әгәр торлаҡ булмаһа, хеҙмәт торлағы бирелә, льготалы отпускылар, формалы кейем бирелә, - тип һөйләнеләр мәктәп уҡыусыларына «Хоҡуҡ һаҡлау эшмәкәрлеге» кабинетында.
Әйткәндәй, тап ошо һөнәргә инеү өсөн юғары балл - уртаса 4,7. Түләүле уҡыу ҙа, льготалы урындар ҙа бар. Колледжда уҡытылған һөнәрҙәр хаҡында йәштәр тулы мәғлүмәт алды, мәктәптән һуң тап бында уҡырға килеү теләген дә нығытып ҡуйҙы.

- Мин Салауат мәғариф һәм һөнәри технологиялар колледжында «Сауҙа эше» һөнәре буйынса беренсе курста уҡыйым. Колледжда миңә барыһы ла оҡшай, спорт секцияларында шөғөлләнәм, бынан тыш, башҡа сараларҙа ла ҡатнашам, әле бына «Профессионалитет» амбассадорымын. Мин был уҡыу йортон һайлауыма бер ҙә үкенмәнем. Сығарылыш уҡыусылары бында килһен, яҡшы белем алыуҙан тыш, төрлө яҡлап үҫешәһең, - ти Оксана Винникова.