Салауатта участка һайлау комиссиялары нисек эшләне?

580-се һайлау участкаһының эше тураһында уның рәйесе Айнур Ирғәлин, 571-се һайлау участкаһының эше хаҡында рәйесе Ольга Татарова һөйләне.
- Һауа торошо яҡшы, тәбиғәткә сығырға ла мөмкин, әммә һайлаусыларҙың күпселеге уның урынына беҙгә килеп, үҙҙәренең гражданлыҡ позицияһын белдереүҙе һайланы. Һайлауҙың һуңғы көнө һәр ваҡыт бик тулҡынландырғыс. Бәхеткә, һайлаусылар килеүен дауам итә, теләгән һәр кем 8-гә тиклем ҡатнашырға өлгөрөр тип өмөтләнәм, - тине ул.
Йола буйынса, колледжда һайлауҙар ваҡытында һайлаусылар өсөн концерттар үткәрелде.
- Һәр юлы ҡала халҡын коллективтарыбыҙҙың сығыштары менән ғәжәпләндерергә тырышабыҙ. Халыҡҡа был оҡшай, - билдәләне Айнур Ирғәлин.
Ҡала мәғариф идаралығында урынлашҡан 571-се һайлау участкаһында ла кеше күп. Бында участка һайлау комиссияһы рәйесе - Ольга Татарова.
- Был команда менән беҙ ике срок эшләйбеҙ. Коллектив татыу, бер-беребеҙҙе ярты һүҙҙән, хатта ярты ҡараштан аңлайбыҙ. Шуға эшләү уңайлы һәм еңел. Беҙҙең участка һайлаусылары ла бик яҡшы, - билдәләне Ольга Татарова.
Быйыл участкала һайлауҙар нисек үтә икән?
- Бик әүҙем. Беҙгә өлкән йәштәгеләр ҙә, йәштәр ҙә, ғаиләләр, махсус хәрби операция ҡатнашыусылары һәм уларҙың яҡындары килә, - тине Ольга Татарова. - Һайлауға тотош ғаилә менән килеүҙәре ҡыуандыра, айырыуса Ҙур һәм татыу ғаилә йылында.
20 сентябрҙә төшкө сәғәт 1-ҙә участкала тәүге тапҡыр тауыш биргән 11 йәш кеше килгән. Шулай уҡ махсус хәрби операцияла ҡатнашыусыларҙың ике ғаиләһе лә мөһим ваҡиғанан ситтә ҡалмаған.
- Бөтә балалар өсөн бүләктәр әҙерләнек - барыһына ла сағыу шарҙар бүләк итәбеҙ, - тип уртаҡлашты Ольга Татарова.