Салауатта һайлау участкаларында музыка яңғыраны

Изге йола буйынса, Салауат музыка колледжында урынлашҡан 580-се һайлау участкаһында һайлаусыларҙы музыка менән ҡаршыланылар.
Иң беренсе булып салауаттарҙы «Элегия» камера ансамбле музыканттары ҡаршы алды. Етәксеһе - Гөлнур Бенифанд.
- Ҡала халҡының туҡтап, беҙҙе тыңлауы, сығышыбыҙға алҡыштар бүләк итеүе күңелде күтәрә! Бынан кәйефебеҙ тағы ла яҡшыра, тағы ла уйнағы килә! - ти Гөлнур Бенифанд. - Репертуарыбыҙ ҙур: классика, заманса һәм күптәргә таныш әҫәрҙәр.
Гөлнур Бенифанд һайлауҙың беренсе көнөндә үк тауыш биреүҙә ҡатнашыуын һөйләне.
- Беҙҙе быға бәләкәйҙән өйрәттеләр. Һайлауға барырғамы-юҡмы тигән һорау бер ваҡытта ла тыуманы. Шуға күрә мин әле лә, тәүге тапҡыр тауыш бирергә барған ваҡыттағы кеүек, байрамға барғандай барам, - ти Гөлнур Бенифанд.
Икенсе музыкаль номерҙы һайлаусыларға Салауат музыка колледжының «Рәсәй халыҡтарының милли ҡоралдары» һөнәре буйынса икенсе курс студенты Данил Туҡтаров бүләк итте. Ул ҡурайҙа уйнаны.
- Музыка менән һигеҙ йәшемдән шөғөлләнәм. Үҙем Ишембайҙан. Ата-әсәйемдең урындағы түңәрәккә яҙылырға тәҡдим иткәнен әле лә хәтерләйем -музыкаға юлым шулай башланды. Мәктәптән һуң Салауат колледжына уҡырға индем һәм быға бик шатмын, - ти Данил. - Ҡурай - иң матур музыка ҡоралылыр, тип иҫәпләйем, уның яңғырауы бик оҡшай.
Колледжды тамамлағас, егет армияла хеҙмәт итергә, шунан юғары белем алырға һәм һөнәре буйынса эшләргә ниәтләй.
- Өйгә яҡын булыр өсөн Өфөлә уҡырға теләр инем, - тип Данил үҙ пландары менән уртаҡлашты.
20 сентябрҙә ҡала мәғариф идаралығындағы 571-се участкала ла күңелле музыка яңғырай ине: һайлаусыларҙы Татьяна Хафизова етәкләгән «Сударушка» рус халыҡ ҡоралдары халыҡ ансамбле ҡаршы алды. Музыканттарҙың сығышын күптәр видеоға төшөрҙө, ә кемдәрҙер бейергә лә төштө.
- Беҙҙең ансамблгә 25 йыл. Беҙ бөтә һайлауҙарҙа ла сығыш яһайбыҙ. Һәр ваҡыт кешеләр беҙҙең сығыштарҙы йылы ҡабул итә, шуға тағы ла күберәк эшләге һәм ижад итке килә, - тине Татьяна Хафизова.
Татьяна Хафизова музыкала 40 йылдан ашыу.
Ансамблдең репертуары ла бик бай.
Татьяна Хафизова һайлауҙарҙа 18 сентябрҙә үк тауыш биргән.
- Илдең киләсәген хәстәрләрү өсөн һайлауҙа ҡатнашырға кәрәк, тип иҫәпләйем, - ти ул ышаныслы рәүештә.
«Сударушка» ансамбле музыканттары - ҡала, республика һәм бөтә Рәсәй кимәлендәге педагогик оҫталыҡ конкурстары ҡатнашыусылары, Өфө конкурстарының береһендә Гран-приға эйә булалар.