Тыуған яҡта - эш һәм бай социаль пакет

Салауат ҡалаһының Балалар (үҫмерҙәр) ижады һарайында кадрҙар һайлап алыу сараһы үтте. Унда эшкәртеү сәнәғәте өлкәһендәге эре компаниялар вәкилдәре йыйылып, үҙҙәренең вакансиялары менән таныштырҙы. Проекттың төп өҫтөнлөгө - вахта ысулы менән эшләүҙең бөтә уңайлыҡтарын (юғары хеҙмәт хаҡы, социаль пакет) ғаиләңдән айырылмайынса, тыуған төбәгеңдә алыу мөмкинлеге. 
Сарала ҡатнашҡан ҡала хакимиәте башлығы урынбаҫары Ирина Борисова билдәләүенсә, был башланғыс - кешеләрҙең тормош сифатын яҡшыртыуға йүнәлтелгән мөһим аҙым.
- «Башҡорт вахтаһы» - республика проекты. Уның асылы - кешеләргә республиканың ҙур предприятиеларына шундай уҡ шарттарҙа, әммә өйҙәренә яҡыныраҡ эшкә урынлашырға тәҡдим итеү. Беҙҙең маҡсат - һәр кемгә үҙ республикаһында лайыҡлы эш табырға ярҙам итеү. Ғаиләһен ҡалдырып, меңәрләгән саҡрым алыҫлыҡҡа китмәй, бында ла шул уҡ шарттарҙа, әммә өйгә яҡын ерҙә эшләргә мөмкинлек булдырыу, - тине үҙенең сығышында Ирина Борисова.
Башҡортостан Республикаһының ғаилә, хеҙмәт һәм халыҡты социаль яҡлау министрының беренсе урынбаҫары Юрий Мельников билдәләүенсә, проект бөтә ғаилә ағзаларының мәнфәғәттәрен иҫәпкә алып, эшкә урынлашыу мәсьәләләрен
комплекслы хәл итергә мөмкинлек бирә.
- Бөгөн беҙ етди кадрҙар етешмәүен күҙәтәбеҙ: бер эшһеҙгә дүрт вакансия тура килә. Проект предприятиеларға белгестәргә ихтыяжды ҡапларға ғына түгел, ә кешеләргә лә конкурентлы хеҙмәт хаҡы менән эш табырға ярҙам итә. Өфө производство берекмәһенә  генә быйыл 660-тан ашыу кеше эшкә урынлашҡан. Хәҙер беҙ офоҡтарҙы киңәйтәбеҙ һәм «Башнефть» менән хеҙмәттәшлек итә башлайбыҙ, - тип уртаҡлашты Юрий Мельников. - Бөгөн беҙ башвахтаның яңы этабына тотонабыҙ. Беҙҙең партнерыбыҙ - Башнефть. Сығыш яһаусы вәкилдәр кадрҙар дефициты, ниндәй һөнәрҙәр буйынса, һәм иң мөһиме, социаль пакетта ниндәй конкурентлы өҫтөнлөктәр булыуы тураһында ентекле һөйләйәсәк.
«Башнефть - Өфө нефть эшкәртеү заводы» филиалы директорының персонал һәм социаль программалар буйынса урынбаҫары Павел Петров билдәләүенсә, «Башнефть» - нефть сығарыуҙан алып әҙер продукцияны һатыуға тиклем бөтә процестарҙы үҙ эсенә алған ҡеүәтле һәм тотороҡло компания.
- Бөгөн предприятие үҙенең 40 меңлек коллективын тағы ла киңәйтә: төрлө йүнәлештәр буйынса 4 меңгә яҡын вакансия асылған. Компанияға технологик ҡоролмалар һәм нефть сығарыу операторҙары, тауар операторҙары, быраулаусылар һәм башҡа квалификациялы белгестәр талап ителә. Эшкә урынлашыусылар өсөн «Башнефть» тотороҡлоҡ һәм профессиональ үҫеш гарантиялай, - тине ул.
«Башнефть» хеҙмәткәрҙәренә йөҙҙән ашыу түләү (уртаса эш хаҡының 10 проценты тирәһе) ала, шулай уҡ шифаханаларҙа дауаланыу һәм адреслы ярҙам хоҡуғын һаҡлай. Компания йәш белгестәрҙең үҫешенә ҙур иғтибар бүлә: улар өсөн махсус түләүҙәр, фәнни-техник конференцияларҙа ҡатнашыу һәм карьера баҫҡысынан күтәрелеү мөмкинлектәре ҡаралған. Бынан тыш, «Башнефть» спортты әүҙем үҫтерә, шул иҫәптә үҙенең хоккей командаһына ла ҙур ярҙам күрһәтә.
Бөгөн сәнәғәт өлкәһендә кадрҙар етешмәү мәсьәләһе киҫкен тора. Был хаҡта «Башнефть» компанияһының бүлендек предприятиеһы булған «РН-КАТ» йәмғиәтенең генераль директоры Сергей Егоркин асыҡтан-асыҡ һөйләне. Уның һүҙҙәренсә, заводҡа бигерәк тә 4-се һәм 5-се разрядлы аппаратсылар кәрәк. Ошо мәсьәләне хәл итеү маҡсатында үткәрелгән осрашыу ябай ғына презентация форматында түгел, ә тура диалог рәүешендә ойошторолдо. Бында һәр кем үҙен ҡыҙыҡһындырған һорауҙарҙы туранан-тура етәкселеккә бирә, шәхси консультация ала алды. Күп салауаттар өсөн был осрашыу «сәйәхәтсе-вахтасылар» булыуҙан туҡтап, карьераһын өйҙә, туғандары янында башлау өсөн беренсе аҙым
булды.
Ойоштороусылар белдереүенсә, кадрҙар йыйыу буйынса был проект киләсәктә Башҡортостандың башҡа райондарында ла дауам итәсәк. Осрашыуға килә алмағандар өсөн вакансиялар һәм эшкә урынлашыу шарттары тураһында тулыраҡ  мәғлүмәт алыу өсөн Салауат ҡалаһы буйынса халыҡ мәшғүллеге үҙәге филиалына мөрәжәғәт итергә кәңәш ителә.
Зилә СӘЛИМОВА.
Автор фотолары.