Геройҙар хәтере - мәңгелек

Башҡортостан Башлығы Радий Хәбиров ҡалаға эш сәфәре менән килгәнендә июндә асылған «Ватан Геройҙары» хәрби хәрәкәттәр ветерандарына һәм уларҙың ғаилә ағзаларына ярҙам итеү үҙәгендә булды.

«Газпром нефтехим Салауат» компанияһы ярҙамында бинаға капиталь ремонт үткәрелгән. Муниципаль бюджет аҡсаһына мебель һәм ҡорамалдар һатып алынған. Үҙәк базаһында «Ватанды һаҡлаусылар» махсус хәрби операцияһында ҡатнашыусыларға ярҙам итеү дәүләт фонды филиалы, Махсус хәрби операция ветерандары Ассоциацияһы һәм Ватандың һәләк булғандар ғаиләләренең Дөйөм Рәсәй йәмәғәт ойошмаһының төбәк бүлексәһе эшләй.

Төбәк етәксеһе конференциялар залын, психолог һәм юрист кабинеттарын, архивты, релаксация бүлмәһен ҡараны. Бында Махсус хәрби операция ветерандары һәм Салауат тарихи-тыуған яҡты өйрәнеү музейы белгестәре ойошторған музей урынлаштырылған.

«Ватанды һаҡлаусылар» дәүләт фондының социаль координаторы Сергей Данилов әйтеүенсә, элек учреждение хеҙмәткәрҙәре ҡаланың мәғариф бүлеге бинаһында эшләгән, эш шарттары заманса талаптарға яуап бирмәгән.

- Хәҙер бер урында бер юлы өс ойошма эшләй, был, һис шикһеҙ, махсус хәрби операция ветерандары һәм уларҙың ғаилә ағзалары өсөн уңайлы, – тип билдәләне Сергей Данилов. - Үҙәккә хәрби хәрәкәттәр ветерандары килә, бында һаулыҡ мөмкинлектәре сикләнгән кешеләр өсөн дә шарттар булдырылған.

Үҙәктә Башҡортостан Башлығы һәләк булған махсус хәрби операция ҡатнашыусыларҙың әсәләре менән аралашты.

- Иң мөһиме, һеҙ үҙегеҙгә бикләнмәйһегеҙ, беҙҙең яугирҙар өсөн һеҙҙең менән аралашыу мөһим. Һеҙ уларҙың проблемаларын башҡаларҙан яҡшыраҡ аңлайһығыҙ, – тип билдәләне Радий Хәбиров.

Журналистар менән әңгәмәлә Радий Хәбиров, республика муниципалитеттарҙа махсус хәрби операцияла ҡатнашыусыларға һәм уларҙың ғаиләләренә ярҙам итеү үҙәктәрен булдырыуҙы дауам итә, тип билдәләне.

- Был эште мөмкин тиклем әүҙемерәк алып барырға кәрәк. Яугирҙарыбыҙҙың заманса һәм уңайлы шарттарҙа ярҙам алыуы мөһим. Салауатта бер ҡыйыҡ аҫтында «Ватанды һаҡлаусылар» фондын, Махсус хәрби операция ветерандары Ассоциацияһын берләштереүҙәре яҡшы, - тине Радий Хәбиров. - Бында кешеләр аралаша, бер-береһенә ярҙам итә һәм килеп тыуған мәсьәләләрҙе бергәләп хәл итә ала. Бындай ҙур ҡала өсөн был үҙәк, ысынлап та, кәрәк.

Фотолар Башҡортостан Башлығының матбуғат хеҙмәтенән.