Милләт-ара татыулыҡты нығытыу - ҡаланың тотороҡло үҫеше нигеҙе

Ҡала хакимиәте башлығы Марат Зәһиҙуллин билдәләүенсә, төрлө мәҙәниәттәр һәм милләттәр вәкилдәре араһында тыныслыҡты һәм татыулыҡты һаҡлау – ҡаланың тотороҡло үҫеше өсөн нигеҙ булып тора.
- 2026 йылда берлектәге эшебеҙ уңышлы булыр һәм милләт-ара дуҫлыҡты һәм үҙ-ара аңлашыуҙы нығытыуға тос өлөш индерер, тип ышанам, – тине ул.
«Әннәби» мәсетендә быйыл өс меңгә яҡын мосолманды ҡабул итеү көтөлә. Мәсет комплексы иртәнге сәғәт 8-ҙән йома көндөҙгө 16-ға тиклем эшләйәсәк. Имамдар ҡөрьән уҡыу, доға ҡылыу һәм халыҡтың һорауҙарына яуап биреү өсөн әҙер буласаҡ. Рәсми өлөш иртәнге сәғәт 10-да башлана, унда ҡаланың абруйлы кешеләре, Өфө һәм Мәскәүҙән ҡунаҡтар саҡырыласаҡ. Шулай уҡ махсус хәрби операция ветерандары һәм һәләк булған һалдаттарҙың әсәләре лә саҡырыласаҡ.
«Ихлас» мәсетендә лә байрам саралары үтәсәк, унда 200-гә яҡын мосолман ҡатнашыуы көтөлә. Тәм-том әҙерләнәсәк, ике имам ҡөрьән һәм доға уҡыясаҡ. Аш-һыу әҙерләү асыҡ утта башҡарыласаҡ, бөтә хәүефһеҙлек саралары ла күҙҙә тотоласаҡ.
Полиция начальнигының йәмәғәт тәртибен һаҡлау буйынса урынбаҫары Евгений Баринов байрам көнөндә хәрәкәтте сикләү һәм иғтибар итергә кәрәк булған урындар тураһында мәғлүмәт бирҙе. Губкин урамында мәсет янында дүрт ведомствонан тыш һаҡ хеҙмәткәре, бер автопатруль һәм бер ЮХХДИ экипажы тәртипте һаҡлаясаҡ. Колхоз урамында ла автопатруль йәмәғәт тәртибен тәьмин итәсәк. Иртән ике объектта ла кинологтар тикшереү үткәреп, хәлде хәбәр итәсәк.
12 апрелдә христиан донъяһының иң мөһим байрамдарының береһе – Пасха билдәләнә. Был көн тормоштоң үлемде еңеүен, яңырыуҙы һәм өмөттө сағылдыра. 23 февралдә Бөйөк ураҙа башланған, ә 5 апрелдә Вербное воскресенье билдәләнә. Пасханың төп традициялары – ғибәҙәтханаларҙа куличтарҙы, йомортҡаларҙы һәм пасханы изгеләндереү.
Салауат халҡы Пасханы ике сиркәүҙә лә – Өфө урамындағы һәм Мусинолағы ғибәҙәтханаларҙа – байрам итәсәк. Байрамға әҙерлек барышында хәүефһеҙлек мәсьәләләренә айырым иғтибар бирелә.
Салауат епархияһы руханийы Александр Заһиров һүҙҙәренсә, полиция менән хеҙмәттәшлек яйға һалынған. Патрулдәр ғәҙәттәгесә урындарҙа торасаҡ, тәртип һаҡланасаҡ, һәм быға тиклем бер ниндәй ҙә эксцесстар булмаған.
- Пасха алдынан, Бөйөк шәмбелә, кешеләр ағымы башлана, сөнки куличтарҙы изгеләндереү үткәрелә. Ғибәҙәт ҡылыу төнгө 11 сәғәттә башлана. Йәкшәмбе, Пасха көнөндә лә, кешеләр киләсәк, сөнки куличтарҙы изгеләндереү дауам итәсәк, – тип билдәләне Александр Заһиров.
Евгений Баринов өҫтәүенсә, сиркәүҙәр янында мотлаҡ рәүештә автопатрулдәр – ЮХХДИ хеҙмәткәрҙәре ҡуйыласаҡ, сөнки байрамға күп машиналар килә.
Ике ғибәҙәтханала ла байрам ваҡытында янғын хәүефһеҙлеге тәьмин ителәсәк: Өфө урамындағы сиркәүҙә 36-сы янғын һүндереү часы хеҙмәткәрҙәре, ә Мусинола авария-ҡотҡарыу отряды хеҙмәткәрҙәре дежур итәсәк.
Байрам урындарында медицина персоналы булыу мәсьәләһе лә тикшерелде. Мәҫәлән, «Әннәби» мәсетендә шәфҡәт туташтары 20 мартта иртән үк исем ҡушыу залында буласаҡ. Ошондай уҡ сараларҙы Пасха көнөндә лә сиркәүҙәрҙә ҡабул итеү планлаштырыла.
Ултырыш аҙағында Милләт-ара татыулыҡ буйынса Совет 2026 йылға эш планын ҡараны һәм раҫланы, был Салауатта төрлө конфессиялар һәм милләттәр араһында татыулыҡты нығытыуға йүнәлтелгән сараларҙың дауам ителеүен күрһәтә.