Радий Хәбиров ҡала активы менән Салауатты үҫтереү мөмкинлектәрен ҡараны

- Бындай форматта беҙ тәүге тапҡыр осрашабыҙ. Шуға күрә бөгөн беҙҙең асыҡ диалог алып барыу мөмкинлеге бар. Республиканың башҡа муниципалитеттарының кеүек үк, Салауаттың яҙмышына ла мин битараф түгел, - тип билдәләне Радий Хәбиров. - Һеҙҙең ҡалағыҙ бик ныҡлы. Интеграль рейтинг буйынса ул төбәктең туғыҙ ҡала округы араһында алтынсы, ә халыҡ һаны буйынса республикала өсөнсө урынды биләй. Ҙур предприятиелар, шул иҫәптән ҡалаға нигеҙ һалыусы «Газпром нефтехим Салауат» уңышлы эшләй.

Осрашыуҙа ҡатнашыусылар ҡала йәшәйешенең ағымдағы кимәлен һәм артабанғы социаль-иҡтисади үҫеш пландарын ҡараны. Төбәк етәксеһе халыҡтың йәшәү сифатын яҡшыртыу өсөн муниципалитет етәкселеге тарафынан яңы башланғыстар кәрәклеген билдәләне.

- Айырым иғтибар талап иткән һорауҙар бар. Был тәү сиратта Салауаттың байлығын формалаштырыусы эшҡыуарҙар, йәмәғәт ойошмалары менән эшләү, - тине Радий Хәбиров. - Торлаҡ төҙөлөшө темптарын арттырырға, урамдарҙа тәртип һәм таҙалыҡ урынлаштырыу менән әүҙемерәк шөғөлләнергә кәрәк.

Башҡортостан башлығы хәбәр итеүенсә, 2025 йылда Салауатта яңы мәктәп төҙөлә башлаясаҡ. Шулай уҡ йәмәғәт мөхиттәрен, ихата биләмәләрен һәм күп фатирлы йорттарҙың подъездарын төҙөкләндереү планлаштырыла.

- Быйыл Өфөнән ситтә һәм тулыһынса республика средстволары иҫәбенә төҙөй башлаған берҙән-бер урта дөйөм белем биреү учреждениеһы - ул һеҙҙең ҡаланың «Көнсығыш» биҫтәһендә 800 урынлыҡ мәктәп, - тине Радий Хәбиров. - Үҙәк майҙанда тәртип урынлаштыра башлайбыҙ, ә 2026 йылда ихаталарҙы һәм подъездарҙы ремонтлауға аҡса бүләбеҙ. Быйыл Р-240 трассаһында Стәрлетамаҡтан Ергәнгә тиклемге участканы киңәйтеү буйынса эштәрҙең төп күләме лә старт ала. Был федераль әһәмиәттәге юл, уны реконструкциялауға федераль финанслау йәлеп итәбеҙ. Ике йыл эсендә барыһын да эшләйәсәкбеҙ, тип уйлайым. Был Салауат халҡы өсөн дә яҡшы ваҡиға, был юлдан йөрөүе уңайлы буласаҡ.

Радий Хәбиров шулай уҡ 2025 йылдың майында Салауат эшҡыуарҙар берләшмәһе менән осрашыу үткәреләсәге тураһында белдерҙе.
- Беҙ бөтә муниципалитеттарға барырға ниәтләйбеҙ, - тип һөйләне төбәк етәксеһе. - Ҙур команда - министрлыҡ, ресурстар менән тәьмин итеүсе ойошма вәкилдәре менән киләбеҙ һәм һеҙҙең башланғыстарығыҙҙы ҡарайбыҙ.

Осрашыуҙа ҡатнашыусылар шулай уҡ хәрби хәрәкәттәр ветерандарына ер участкалары биреү, медицина кадрҙарын йәлеп итеү, заманса кинотеатр асыу мәсьәләләренә ҡағылды.

Фото Башҡортостан Башлығы сайтынан.