Бындай йәштәр булғанда...

Беҙҙең ҡала исеменән Юлиә Гулина (24-се мәктәп), Дамир Фәйзуллин, Серафима Тептева (1-се лицей), Илназ Юлдашбаев (18-се мәктәп), Руфина Бикиева (8-се лицей) һәм Артем Мухин (20-се мәктәп) лайыҡлы сығыш яһаны. Улар алдында түбәндәге нормативтарҙы үтәү бурысы торҙо: гимнастика эскәмйәһендә тура баҫҡан килеш алға эйелеү, ҡулға таянып кәүҙәне күтәреү, ятҡан килеш кәүҙәне күтәреү, урындан оҙонлоҡҡа һикереү, 50 метр дистанцияға йөҙөү, ике һәм 3,5 километрға саңғыла йүгереү. Йәштәр яҡшы һөҙөмтәләр күрһәтеп, дөйөм команда иҫәбендә лайыҡлы икенсе урын алып ҡайтты.
Салауат ҡалаһының «Триумф» спорт мәктәбендә фестиваль призерҙары менән осрашыу үтте. Ул ябай һәм еңел шарттары уҙҙы. Әҙерлек һәм ярыштар ваҡытында балалар үҙ-ара яҡынлашҡан, күптән таныштар кеүек аралашып, бер-береһен төрттөрөп, көлөшөп ултырҙы. Ярышҡа әҙерлек нисек барған, фестиваль нисек үткән, балаларға нимә оҡшаған йә оҡшамаған, улар үҙ һөҙөмтәләре менән ҡәнәғәтме? Был хаҡта йәш спортсылар осрашыу ваҡытында һөйләне.
- Әҙерлек барышында ауырлыҡтар менән осрашырға тура килде. Кемдер спортта оҙайлы тәнәфес яһау сәбәпле, ҡапыл ғына режимға инеп китә алманы, кемгәлер – йөҙөү, кемгәлер саңғы, ҡулға таянып кәүҙәне күтәреү ауыр бирелде. Фестивалдә булған ауырлыҡтар хаҡында һүҙ йөрөткәндә, ойоштороусылар билдәләгән ҡағиҙәләргә һис тә әҙер булманыҡ. Мәҫәлән, күнекмәләргә ваҡыт бүленмәне, әммә был һәр спорт ярышының мөһим өлөшө булып торороға тейештер, тип уйлайбыҙ. Әллә ғәҙәттәгесә булмағанға, әллә тулҡынланыуҙан, быға тиклем тапшырған нормативтар унда ҡатмарлыраҡ кеүек тойолдо, - тип һөйләне Руфина Бикиева.
Һеҙҙең хәтерегеҙҙә һаҡланып ҡалған мәлдәр булдымы, тигән һорауға йәштәр бер тауыш менән “саңғы” тип яуап бирҙе лә, бер-береһенә ҡарашып көлөп ебәрҙе.
- Мин саңғыла йөрөргә яратмайым. Башҡалар саңғыға күптән «баҫҡан», ә мин йөҙөү менән шөғөлләнә инем, шуға күрә ауырлыҡтар булды, саңғы – ул минеке түгел, - тип бүлеште Руфина.
- Ләкин Руфина өсөн йөҙөү буйынса норматив ҡыйынлыҡ тыуҙырманы. Ә беҙ 50 метрлыҡ бассейнға әҙер түгел инек, - тине башҡа йәш спортсылар.
- Беҙҙең йыйылма команда бер бүлмәлә йәшәне - был онотолмаҫлыҡ ваҡиға булды! - тип хәтирәләре менән уртаҡлашты Артем. Әммә ни өсөн тап ошо мәл уның хәтерендә ҡалған, беҙ белә алманыҡ, Артем быны сер итеп, һорауҙы асыҡ ҡалдырырға булды.
- Төбәк фестивалендә ҡалабыҙҙың данын яҡлау өсөн йыйылма команда составына инеү еңелдән булманы. Тәүҙә беҙ мәктәп этабында ГТО нормаларын тапшырҙыҡ, ә иң яҡшыларын төбәк этабында һайлап алдылар һәм йыйылмаға индерҙеләр, - тип ғорурлыҡ менән һөйләне Серафима.
Салауат ҡалаһы йыйылма командаһы составына тап ошо йәштәрҙе һайлауҙары юҡҡа түгел, сөнки йәш булыуҙарына ҡарамаҫтан, улар Бөтә Рәсәй ярыштарында ҡатнашып, призлы урындар яулаған һәм хатта Башҡортостан Республикаһы чемпиондары булған. Дамир Фәйзуллин - йөҙөү һәм саңғы буйынса республика ярыштары призеры, Илназ Юлдашбаев – триатлон буйынса Рәсәй беренселеге эстафетаһында өсөнсө урын яулаусы, Артем Мухин - триатлон буйынса Рәсәй призеры һәм ҡышҡы триатлон буйынса спорт мастерлығына кандидат, Юлиә Гулина - биатлон буйынса Башҡортостан этабында призер, Серафима Тептева ла Бөтә Рәсәй ярыштарында призлы урындар яулаған.
Спорттағы ҡаҙаныштары өсөн йәш спортсылар тренерҙары Зөфәр Искәндәровҡа, Лилиә Абсаттароваға, Владимир Акшенцевҡа һәм Николай Столяровҡа рәхмәтле. Улар үҙ тәрбиәләнеүселәренә бөтә күңелен һалған.
Фестиваль йәш спортсылар өлгәшелгәндәрҙә туҡталып ҡалырға ярамай, артабан яңы үрҙәргә ынтылырға кәрәк икәнлеген аңларға ярҙам иткән. Улар хатта йәштәргә бер аҙ кәңәш бирҙе:
- Ни өсөн бының менән шөғөлләнәһең, тигән һорауға ҡайһы берҙә ата-әсәйем мәжбүр итә, тип яуап ҡайтаралар. Улай дөрөҫ түгел. Күңелегеҙ теләгәнсә эшләгеҙ, нимә оҡшай, шуның менән шөғөлләнегеҙ. Шул саҡта ғына һеҙ ниндәйҙер бейеклектәргә өлгәшә аласаҡһығыҙ.

Спортсыларҙың йәш булыуына ҡарамаҫтан, уларҙа тыуған ҡалабыҙ өсөн яуаплылыҡ һәм илһөйәрлек тойғоһо һалынған. Балалар менән осрашыу яҡшы тәьҫораттар, энергия һәм позитив ҡына бүләк итте.

Автор фотоһы.