Ҡарҙар ирей, һыу таша

- Ағиҙелдә быйыл боҙ китеүе ғәҙәттәгенән өс аҙнаға алдараҡ башланды. Сәбәптәре бер нисә. Беренсенән, быға тиклем Йомағужа һәм Нөгөш гидроузелдары һыу йыйып, аҙаҡ уны әкренләп сығарғас, боҙ һыу аҫтында ҡалып яйлап ирей ине. Быйыл һауа температураның ҡапыл күтәреүе һәм өс көн ҡойма ямғыр яуыуы арҡаһында, артыҡ дым туңған тупраҡҡа һеңмәй йылға системаһына ағып төштө. Беҙҙә боҙ китеү башланды. Боҙҙоң ҡалынлығы 40-50 сантиметр тәшкил итте. Ағиҙел йылғаһы буйлап тығындар булған хәүефле участкалар барлыҡҡа килде. Бындай хәл Салауатта ғына түгел, - тип һөйләй ҡаланың Гражданадар оборонаһы эштәре һәм ғәҙәттән тыш хәлдәр идаралығы начальнигы Радик Моратов.

Тығындар ҡурҡынысы һыу баҫыуға алып килеүе мөмкин. Былтыр Ырымбур өлкәһендәге хәл быға асыҡ миҫал. Беҙҙә Һабаш күперендә, йома кисендә Желанный ҡасабаһы тирәһендәге баҡсалар янында ҙур булмаған тығындар барлыҡҡа килгәйне, хәҙер хәл контролдә тотола.

- Шартлатыу эштәре боҙҙо ваҡларға кәрәк булған осраҡта башҡарыла, - тип аңлата Радик Моратов. - Йәғни, ниндәйҙер ҙур боҙ участкаһын өлөштәргә бүлеү өсөн эшләнә. Әйткәндәй, беҙ шартлатыу эштәрен башлаһаҡ, хатта күпкә насарыраҡ күренеш булыуы ихтимал. Һөҙөмтөлә ҙур боҙлоҡтар барлыҡҡа киләсәк, улар борола башлай һәм йылға төбөнә терәлә. Шул саҡта һыу баҫыу хәүефе күпкә арта. Шуға күрә хәҙер шартлатыу эштәрен башҡарыу маҡсатҡа ярашлы түгел. Әгәр берәй ерҙе шартлатырға кәрәклеген күрһәк, беҙ быны эшләйәсәкбеҙ. Әммә әлегә был кәрәкмәй. Иң ҡурҡыныс осорҙо беҙ йома көнө кисерҙек. Хәҙер һыу кәмей, түбән төшә башланы. Әммә тынысланырға иртәрәк, сөнки йылғала әлегә боҙ күп, яҡын арала ҡалғандарының китеүе көтөлә.

Әлеге ваҡытта “Флора” ойошмаһы яр буйын рәткә килтереү эшен башлаған. Бында һыуға төшөү урыны тулыһынса һәм йәйәүлеләр йөрөй торған юлдың таяуҙары зыян күргән.

- Хәҙер һыуға сығыу юлдарын ябыу буйынса эштәр башҡарабыҙ, - тип һөйләй «Флора» муниципаль бюджет учрежденияһы директоры Наил Баһаутдинов. - Тимер профилдәр менән үткәүелдәрҙе ябабыҙ, артабан өҫтән ағас кәртәләр ҡуябыҙ. Бында 11 кеше эшләй, бөтә кәрәкле ҡорамалдар килтерҙек. Шулай уҡ, кешеләр һыуға яҡын бармаһын өсөн кәртәләр ҡуйҙыҡ, сөнки боҙ металл пандустың таяуҙарын зарарлаған. Шуға күрә ҡала халҡынан иҫкәртеү билдәләренә иғтибар итеүҙәрен һәм кәртә артына үтмәүҙәрен һорайым.

Ҡала халҡын баҡса участкаларында һыу баҫыу көтәме, ул ҡасанға тура килә тигән һорау ҙа борсой. Хакимиәттең Граждандар оборонаһы эштәре һәм ғәҙәттән тыш хәлдәр буйынса идаралығы начальнигы Радик Моратов был мәсьәләгә асыҡ индерҙе.

- Беҙҙең ҡалала ташҡын шартлы рәүештә ике өлөшкә бүленә. Беренсеһе - баҫыуҙарҙан һәм бигерәк тә Өфө-Ырымбур трассаһы артында урынлашҡан тауҙарҙан ирегән ҡарҙың төшөүе. Улар Үрге Юлдаш янында урынлашҡан туғай системаһына төшә. Был осор тыныс ҡына үтте. Икенсе ташҡын осоро - Ағиҙел йылғаһының күтәрелә башлаған осоро. Хәҙер боҙ китә, һуңыраҡ һыуһаҡлағыстарҙан һыу ағыҙыу башлана. Шул саҡта һыу күтәреләсәк, был апрель айына тура килә. Ғәҙәттә ул апрель аҙағында май башында, әммә быйыл процесс өс аҙнаға алдан бара, - тип аңлатма бирә Радик Моратов.
Гөлиә Нуриманова.
Ольга Исакова фотоһы.