Эшлекле юҫыҡтан барабыҙ
Ҡала башлығы Альберт Моталов, был съезд беҙҙең төбәк өсөн генә түгел, бөтә ил өсөн дә әһәмиәтле ваҡиға булды, сөнки ул төрлө халыҡтар вәкилдәрен мәҙәни мираҫты һаҡлау маҡсаты тирәләй берләштерҙе, тип билдәләне.
Ҡала башлығы Альберт Моталов, был съезд беҙҙең төбәк өсөн генә түгел, бөтә ил өсөн дә әһәмиәтле ваҡиға булды, сөнки ул төрлө халыҡтар вәкилдәрен мәҙәни мираҫты һаҡлау маҡсаты тирәләй берләштерҙе, тип билдәләне.
- Ҡалала БР халыҡтары телдәрен һаҡлау һәм үҫтереү буйынса комплекслы эш 38 мәктәпкәсә, 6 өҫтәмә белем биреү учреждениеларында һәм ун һигеҙ мәктәптә алып барыла. Бында үҫеп килгән быуында ҡаланың мәҙәни мираҫына хөрмәт булдырыуға ҙур өлөш индерелә. Мәҫәлән, 50-се балалар баҡсаһында алты төркөм эшләй, унда 126 тәрбиәләнеүсе туған башҡорт телендә белем ала. Ата-әсәләр теләге менән 10-сы, 27-се һәм 55-се балалар баҡсаларында биш башҡорт төркөмө булдырылған. Бөтә мәктәптәрҙә лә дәүләт башҡорт телен уҡытыу алып барыла, 3 000 бала башҡорт телен туған тел булараҡ уҡый. Милләт-ара татыулыҡты һәм үҙ-ара аңлашыуҙы нығытыуға йүнәлтелгән хеҙмәттәре һәм тырышлыҡтары өсөн уҡытыусыларға, ата-әсәләргә рәхмәт белдерәм. Һеҙҙең эшегеҙ традицион ҡиммәттәрҙе заман талаптарына яраҡлаштырыуҙың өлгөһө булып тора, - тине Альберт Юрьевич.
Бөтә донъя башҡорттары ҡоролтайы Президиумы ағзаһы Булат Йосопов үҙенең сығышында мәҙәниәтебеҙ, йолаларыбыҙ, тарихыбыҙ һәм телебеҙ - башҡорт халҡының нигеҙе, тап ошо ҡиммәттәр беҙгә рухи үҫеш бирә, тип һыҙыҡ өҫтөнә алды.
- Салауат ҡалаһында «Ижади майҙан» сараһы ойошторолғайны һәм ҡаланың шул ваҡытта күрһәткән яуаплылығы өсөн бик рәхмәтлемен. Бөгөн дә милли сәнғәтебеҙҙең башҡа мәҙәниәттәр менән берлектә үҫешеүен дауам иттерергә кәрәк. Шул саҡта Салауат беҙҙең төбәктең мәҙәни баш ҡалаһы була ала. Бының өсөн хыялланырға һәм үҙгәрештәрҙән ҡурҡмаҫҡа кәрәк. Төрлө кимәлдәге йондоҙҙарҙы йәлеп итеү, ҙур фестивалдәр ойоштороу, шул уҡ ваҡытта үҙ тамырҙарығыҙҙы онотмау мөһим. Үткәндәрҙе аңламайынса, үҙ тарихыңды белмәйенсә алға барыу мөмкин түгел, - тип билдәләне Булат Тимербай улы.
Ултырышты дауам итеп, ҡала башҡорттары ҡоролтайының башҡарма комитеты рәйесе Азат Юлтимеров сарала ҡатнашыусыларға халҡыбыҙға бәйле мәсьәләләрҙе хәл итеүҙә ҡатнашҡандары һәм вайымһыҙ булмағандары өсөн рәхмәт белдерҙе. Үҙ сығышында ул Салауатта «Башҡортостан Республикаһы халыҡтары телдәре тураһында» Башҡортостан Республикаһы законын тормошҡа ашырыуҙа юл картаһының мөһимлеге хаҡында һөйләне. Тап ошо документ ярҙамында милләтебеҙгә ҡағылған тел, тарих һәм мәҙәниәт һорауҙары хәл ителә тип һыҙыҡ өҫтөнә алды.
- Алдағы биш йыллыҡ осорға ҡала башҡорттары ҡоролтайының пландары, аныҡ маҡсаттары тап ошо съездың ҡарарҙарынан нигеҙләнеп эшләнә. Шуға ла был йыйын беҙҙең өсөн әһәмиәтле булды. Ҡабул ителгән резолюцияларға таянып, уларҙы уртаға һалып һөйләшеп үҙебеҙҙең юл картаһына индерәбеҙ һәм эште ошо юҫыҡта алып барасаҡбыҙ, - тип һөйләне Азат Шәрип улы.
Берҙәмлек, татыулыҡты арттырып
Был көндәге киңәйтелгән ултырышҡа йыйылыусылар VI съездың мөһим ваҡиғаларына ла туҡталды, уларҙың береһе - Башҡортостан Республикаһы Башлығы Радий Хәбировтың сығышы.
- Төбәк башлығы үҙенең сығышын съездың ил өсөн ауыр ваҡытта үтеүен һыҙыҡ өҫтөнә алды. Ул, әлеге мәлдә беҙҙең дөйөм бурысыбыҙ берләшеү, тип билдәләне. Күп милләтле Башҡортостандың именлеге һәм сәскә атыуы - республика Башлығының үҙ алдына ҡуйған төп маҡсаты. Радий Фәрит улы грант эшмәкәрлеген үҫтерергә тәҡдим итә, мәҫәлән, 2024 йылда 50 миллион һум аҡса бүленгән. Ҡыҙыҡлы проекттар һәм милли саралар иғтибарһыҙ ҡалмаясаҡ. Өфөлә кире ҡайтарылған исемдәр музейы асыла, шулай уҡ Салауат Юлаев һәйкәлен реставрациялау мотлаҡ талап ителә, - тине съезд делегаты, мәғариф идаралығы начальнигы урынбаҫары Зөлфиә Хәсәнова.
- Төбәк башлығы Радий Хәбиров үҙенең командаһы менән бергә мөһим мәсьәләләрҙе хәл итеүҙә юғары кимәлдәге оперативлыҡ һәм системалы ҡараш күрһәтә. Мәҫәлән, генерал-майор Миңлеғәле Шаморатовҡа Рәсәй Геройы исемен биреү һәм 112-се башҡорт кавалерия дивизияһына һәйкәл ҡуйыу тураһында күп йыллыҡ фекер алышыуҙар, ниһайәт, уңыш менән тамамланды. Ҙур комплекслы проекттар - «Шүлгәнташ» һәм «Тура хан» күсмә цивилизациялар музейҙары, «Салауат ере» комплексы, Башҡорт теле көнө, Милли кейем көндәре булдырылды. Башҡортостан Башлығы Радий Хәбировтың 10 октябрҙе Ҡурай көнө һәм Дәүләт ҡурайсылар ансамблен ойоштороу тураһында ҡарар ҡабул итеүе лә ҡыуаныслы. Беҙҙең ҡалала ла «Торналар йыры» балалар фольклор проектын тергеҙергә теләр инек, - тип билдәләне Башҡортостандың атҡаҙанған мәҙәниәт хеҙмәткәре Иҙел Хәлимов.