Ҡаһарманлыҡ онотолмай

Ватанды һаҡлаусылар көнө алдынан Белоруссияны азат итеүҙә ҡатнашыусы Бөйөк Ватан һуғышы ветерандарына иҫтәлекле миҙалдар тапшырылды. Һуғыш яугирҙәрен ҡала хакимиәте башлығы урынбаҫары Нил Ғабдрахманов һәм һуғыш, хеҙмәт, хәрби көстәр һәм хоҡуҡ һаҡлау органдары ветерандары советы рәйесе Гүзәл Хөснуллина ҡотланы.

- Белорусь Республикаһы һеҙҙе “Белорусь Республикаһын немец-фашист илбаҫарҙарынан азат итеүҙең 75 йыллығы” миҙалы менән бүләкләй. Тыуған илебеҙгә хеҙмәт итеүегеҙ, уны һаҡлап алып ҡалыуығыҙ һәм башҡа дәүләттәргә лә иреклек яулауығыҙ өсөн рәхмәт әйтәбеҙ. Именлек, һаулыҡ теләйбеҙ, яҡындарығыҙҙы ҡыуандырып оҙон ғүмер кисерегеҙ һәм уларҙан изгелек, ихтирам күреп донъя көтөгөҙ, - тине Нил Әнүәр улы.
Ветерандар советы рәйесе Гүзәл Хөснуллина белдереүенсә, әлеге ваҡытта Салауатта Белоруссияны азат итеүҙә ҡатнашыусы 5 ветеран йәшәй. “Белорусь Республикаһын немец-фашист илбаҫарҙарынан азат итеүҙең 75 йыллығы” миҙалдары Антонина Горелкинаға, Николай Зебровҡа, Василий Корнеевҡа, Рәшит Әхмәҙиевҡа һәм Мария Григорьеваға тапшырылды.
#ЗащитимВетеранов