"Таҙа шишмә" акцияһы

Ошо көндәрҙә Башҡортостан Тәбиғәттән файҙаланыу һәм экология министрлығының Стәрлетамаҡ территориаль идаралығы белгестәре Ғафури районында “Таҙа шишмә” экологик акцияһын ойошторҙо.

Сара “Ҡотлоғужа яланғаслыҡтары” төбәк әһәмиәтендәге тәбиғәт ҡомартҡыһы биләмәһендә уҙғарылды. Төп маҡсаты - тәбиғәткә, махсус һаҡланған тәбиғәт биләмәләренә һаҡсыл мөнәсәбәт, һыу ятҡылыҡтарын тәртипкә килтереү һәм халыҡта экологик мәҙәниәт тәрбиәләү. Бындай акциялар “Экология” милли проектының “Үҙенсәлекле һыу объекттарын һаҡлау” федераль проекты нигеҙендә бойомға ашырыла.

Министрлыҡ вәкилдәре сара барышында тәбиғәт ҡомартҡыһы биләмәһен тәртипкә килтерҙе, сүп-сарҙан таҙартты. Тәбиғәтте һаҡлау ведомствоһы белгестәре Ауырғазы, Ғафури, Ишембай, Стәрлебаш һәм Стәрлетамаҡ райондарындағы махсус һаҡланған тәбиғәт биләмәләренә даими мониторинг ойоштора.

#Миллипроекттар

Фото: Башҡортостан Республикаһының Тәбиғәттән файҙаланыу һәм экология министрлығынан алынды.