Салауат ҡалаһы алдынғы

Салауат Рәсәйҙә халыҡтың тормош сифаты үҫеше буйынса иң яҡшы ҡала тип билдәләнде.
Бөтә Рәсәй “Халыҡ тормошо сифатынкүтәреү өлкәһендә Рәсәйҙең иң яҡшы муниципаль берәмеге” конкурсының “Иҡтисадты үҫтереү өлкәһендә юғары сифатлы идара итеү өсөн” номинацияһында беренсе урын алды, тип ҡыуаныс менән бүлеште социаль селтәрҙәге үҙенең сәхифәһендә ҡала хакимиәте башлығы Игорь Миронов.
Был конкурстың һәр номинацияһында билдәле бер критерийҙар иҫәпкә алына. Беҙҙең ҡала еңеү алған номинацияла комиссия дүрт күрһәткесте иҫәпкә ала - халыҡтың ярлылыҡ, эшһеҙлек кимәле, эре, урта һәм коммерцияға ҡарамаған ойошмалар хеҙмәткәрҙәренең эш хаҡы һәм килемле ойошмаларҙың тотҡан урыны.
- Ошо күрһәткестәр буйынса яҡшы һөҙөмтәләр менән билдәләнеүебеҙ беҙҙең өсөн мөһим, улар Салауат ҡалаһы халҡының тормошона тура йоғонто яһай. Артабан да салауаттарҙың тормошо һәйбәтерәк булһын өсөн эшебеҙҙе дауам итәсәкбеҙ, - тигән ҡала башлығы.