Рәсәй матбуғаты көнө менән!

Бөгөн Рәсәй матбуғаты көнө. “Салауат” гәзите хеҙмәткәрҙәре, бөтә киң мәғлүмәт саралары вәкилдәре кеүек үк, һөнәри байрамын билдәләй. Тоғро дуҫтарыбыҙ беҙҙең менән булғанға ҡалалағы берҙән-бер башҡорт баҫмаһы, Аллаға шөкөр, йәшәй, донъя күреп, сығып килә.

«Салауат» гәзите Салауат ҡалаһының башҡорт телендә сыҡҡан ижтимағи-сәйәси баҫмаһы булараҡ ҡалалағы бөтә мөһим ваҡиғаларҙы, шул иҫәптән, мәҙәни, сәйәси сараларҙы киң яҡтырта, республика, ил тормошо ваҡиғаларын да даими баҫтыра, редакция хеҙмәткәрҙәре яңылыҡтарҙы ваҡытында тулы күләмдә еткерергә, ҡыҙыҡлы мәҡәләләр яҙырға, төрлө проблемаларҙы күтәреп сығырға, уҡыусыларына һәйбәт ял сәғәттәре бүләк итергә тырыша. Уның үҙ даими яҙылыусылары, уҡыусылары бар, улар хаҡтар артыуына һәм башҡа ҡыйынлыҡтарға һылтанып тормай, матбуғатҡа тоғролоҡ һаҡлай, баҫмаға һәр ваҡытта яҙыла, үҙ теләктәрен әйтеп китә, ғөмүмән, һәр саҡ бәйләнеш булдырылған. Бигерәк тә 2021 йылдың тәүге ярты йыллығына яҙылыуҙы ойоштороуҙа ҡала етәкселеге, мәғариф системаһы, башҡорт йәмәғәт ойошмалары ҙур активлыҡ күрһәтте. Ғөмүмән, “Салауат” гәзитен яратып уҡыған, уның артабан да донъя күреүен теләп янып-көйөп йөрөгән дуҫтарыбыҙға ҙур рәхмәт, тибеҙ. Һеҙ булғанда баҫмабыҙ йәшәр. Берҙәмлектә - көс. Бергә булайыҡ - берҙәм булайыҡ.

"Салауат" гәзите коллективы

Сәлимова Зилә Миниғужа ҡыҙы, мөхәррир урынбаҫары

Асҡарова Гөлнара Фирҙәүес ҡыҙы, хәбәрсе

Ғәлиева Динә Ғәфүр ҡыҙы, хәбәрсе