Бушлай белемеңде камиллаштыр

Илдең 23 төбәгенән өс меңдән ашыу кеше Башҡортостанда “Һәр кем өсөн яңы мөмкинлектәр” федераль проектына ярашлы бушлай белемен камиллаштыра. Уҡыу Башҡорт дәүләт университетында ойошторолған.

“Мәғариф” милли проектының “Һәр кем өсөн яңы мөмкинлектәр” проекты 2019 йылда илдең Фән һәм юғары белем биреү министрлығы тарафынан ғәмәлгә индерелгәйне. Маҡсаты - Рәсәй граждандарына өр-яңы һөнәри компетенцияларға һәм оҫталыҡҡа эйә булыу мөмкинлеге биреү.

Пандемия ваҡытында проектҡа ихтыяж айырыуса артты. Быйыл уны тормошҡа ашырыуҙа илдең 50 вузы, шул иҫәптән БДУ ҡатнаша. Университет тыңлаусыларға психология, социология, һанлы технологиялар, геофизика, педагогика, медиа, коммуникациялар, инженерлыҡ-техник өлкә һәм башҡа күп йүнәлештәр буйынса 23 белем биреү программаһы тәҡдим итә. Әле Башҡорт дәүләт университетындағы программалар буйынса Башҡортостанда, Ҡырым Республикаһында, Мәскәү өлкәһендә, Краснодар крайында, Татарстанда, Мари Иле Республикаһында, Магадан өлкәһендә һәм башҡа төбәктәрҙә йәшәгәндәр уҡыу үтә.

#Миллипроекттар

Фото: "Башинформ"мәғлүмәт агентлығынан алынды.