Сәләмәт тәндә - сәләмәт рух

Республикала кисә мәктәп һәм спорт майҙансыҡтарында “Яңы йыл ғаилә уйындары-2021” старт алды. Был күңелле саралар 6 ғинуарға тиклем дауам итә.
Спорт уйындарын хәүефһеҙ үткәреү өсөн бөтөн саралар ҙа күрелә. Саф һауалағы ҡышҡы уйындар тәнгә сәләмәтлек тә өҫтәй, яҡшы кәйеф тә бүләк итә. 25-се башҡорт гимназияһы ла был сараға әүҙем йәлеп ителде.
- Кисә республикала “Яңы йыл ғаилә уйындары-2021” старт алды. Беҙҙең гимназия ла быға әүҙем ҡушылды. Кисә ярыштарҙа 1-се кластар үҙ ғаиләләре менән ҡатнашһа, бөгөн 2-се кластар старт алды. Программа физкультура уҡытыусылар тарафынан төҙөлдө. Унда күңелле старттар, ҡышҡы футбол, саңғыла уҙышыу ҙа ингән. Сараның маҡсаты билдәле инде - ата-әсәләрҙе, балаларҙы сәләмәт тормош рәүешенә ылыҡтырыу. Бындай саралар ата-әсәләрҙе балалар менән яҡынайта ла, берләштерә лә, - ти физкультура уҡытыусыһы Илшат Иҙрисов.
Аҙнаевтар ғаиләһе сарала теләп ҡатнашҡан:
- “Яңы йыл ғаилә уйындарында” тормош иптәшем Денис, 1-се кластағы улым Артур һәм биш йәшлек кесе улыбыҙ Арыҫлан менән ҡатнаштыҡ. Был сарала ҡатнашыу, беренсенән, ғаилә менән бергә актив ял итеү төрө. Икенсенән, саф һауала шау-гөр килеп күңел асыу ысулы, өсөнсөнән, балалар төрлө сараларҙа әүҙем ҡатнашырға өйрәнә, иптәштәре менән күрешәләр, яуаплы булып, коллективта эшләргә өйрәнәләр. Башҡаларға әйтер теләктәрем шул: ошондай матур сараларҙа әүҙем ҡатнашығыҙ, ситтә ҡалмағыҙ. Яңы йыл каникулдары ғаилә менән бергә ял итеү, күңел асыу өсөн иң ҡулай ваҡыт. Гимназияға шундай матур сара үткәргәндәре өсөн, ғаиләләрҙе берләштереп тороуҙары өсөн ҙур рәхмәтлебеҙ, - ти Регина Аҙнаева.
2В класында уҡыусы Лапенкова Мирослава ата-әсәһе менән килгән.
- Саф һауала рәхәтләнеп ҡышҡы футбол уйнаныҡ. Бик күңелле булды. Өйҙә ултырғансы тышта йүгереү, хәрәкәтләнеү күпкә яҡшыраҡ, - ти ҡыҙ.
Ата-әсәһе лә саранан ыңғай тәьҫораттар алған.
- Балаларҙы бәләкәйҙән бындай сараларға ылыҡтырып өйрәтергә кәрәк. Был йәһәттән, ата-әсә өлгө күрһәтергә тейеш. Ялҡаулыҡты еңеп, ярты сәғәттәй ваҡыт талап иткән сараға нисек тә ваҡыт табырға кәрәк. Сәләмәт тәндә - сәләмәт рух. Барыһын да саҡыбарыбҙ ҡатнашырға, - ти Алина Валерьевна һәм Павел Викторович Лапенковтар.

Автор фотолары.