Беҙгә ап-аҡ тунын кейеп Ҡыш бабай килә. Ҡарһылыуы бергә елә, Нур сәсеп көлә-көлә

Бөгөн ҡаланың Ленин исемендәге үҙәк майҙанда “Ҡыш бабай һәм Ҡарһылыу көнө” ҡала конкурсына йомғаҡ яһалды.
11 пар Ҡыш бабай һәм Ҡарһылыу шыршы янына йыйылған бала-сағаларҙы, өлкәндәрҙе ихлас сәләмләне.
- Был конкурс ҡалала быйыл тәүгә үткәрелде. Унда, башлыса, мәғариф, мәҙәниәт хеҙмәткәрҙәре теләп ҡатнашты. Алдағы йылдарҙа ла бындай сараны уҙғарыу матур йолаға әүерелер тип уйлайым, - ти ҡала хакимиәте мәҙәниәт бүлегенең киң күләм мәҙәни саралар уҙғарыу буйынса методист Лилиә Зәйнешева.
Конкурста еңеүселәр һәм еңелеүселәр булманы. Уларҙың һәр ҡайһыһы төрлө номинацияла билдәләнде. Улар шулай уҡ диплом һәм Салауат ҡалаһы тураһындағы энциклопедия менән бүләкләнде.
54-се балалар баҡсаһының Ҡыш бабайҙары, Ҡарһылыуҙары һәм Ҡар бабайы иң яҡшыһы тип танылды. Сағыу костюмдарҙағы Ҡыш бабайҙар - тәрбиәселәр Елена Ермакова, Илүзә Ғәлина, Ҡарһылыуҙар - музыка етәксеһе Нина Квитницкая, физик культура буйынса инструктор Марина Гавшина, Ҡар бабай - тәрбиәсе Яна Чиглинцева. Улар был сарала ҡатнашыуҙарына бик шат:
- Өлкән педагог Светлана Әбдрәхим ҡыҙы ошондай конкурс уҙғарылыуы тураһында бәйән итте һәм беҙ ҡуш ҡуллап риза булдыҡ. Былай ҙа ҡалала ойошторлоған сараларҙан ситтә ҡалғаныбыҙ юҡ, әүҙемлек күрһәтәбеҙ. Мөдиребеҙ Гөлнара Рәфис ҡыҙы был йәһәттән хуплап, ярҙам итеп кенә тора. Бөтә костюмдар ҙа коллективтың тырышлығы, көсө менән тегелде. Балаларҙың шатлыҡлы йөҙҙәрен күреү айырыуса ҡыуаныслы, күңелгә дәрт өҫтәй. Улар бит Ҡыш бабай менән Ҡарһылыуға ихлас ышана, - ти улар.
5-се балалар баҡсаһының Ҡыш бабайы менән Ҡарһылыуы I дәрәжәле лауреат исеменә лайыҡ булған.
- Яңы йыл байрамы алдынан ошондай матур сара уҙғарылыуы бик яҡшы. Ана, барыһының да күңелдәре ниндәй күтәренке! Ҡалала ошондай байрамдар күберәк булһын ине. Ҡала халҡын етеп килгән байрам менән ихлас ҡотлайбыҙ. Ҙур бәхеттәр, иң мөһиме һаулыҡ теләйбеҙ, - ти конкурсанттар.
Сара дәртле флешмоб менән тамамланды. Олоһо ла, кесеһе лә рәхәтләнеп бейеп. Айырыуса, кескәйҙәр шат. Ә байрамдың төп геройҙары менән фотоға төшөргә теләүселәрҙең иҫәбе -хисабы юҡ ине. Ысын мәғәнәһендә, фотосессия ойошторолдо!

Автор фотоһы.