Атай, йөрәккәйем...

Башҡортостан кешеләре тәҡдим иткән иң матур 12 башҡорт һүҙе билдәле. Хәтерегеҙгә төшөрәбеҙ, “Иң матур башҡорт һүҙе” проекты 1 ноябрҙә башланғайны. Ул “Медиаформат” киң мәғлүмәт сараларын популярлаштырыу буйынса балалар-үҫмерҙәр үҙәге менән “Телешко” балалар телевидение мәктәбе тарафынан Башҡортостан Башлығының грантына тормошҡа ашырыла. Әле тауыш биреү тамамланмаған, bashslovo.ru сайтында иң-иң матур башҡорт һүҙе өсөн һеҙ ҙә тауыш бирә алаһығыҙ.

Проектты Башҡортостандың Граждандар йәмғиәтенә булышлыҡ итеү фонды, Бөтә донъя башҡорттары ҡоролтайы һәм “Тамыр” балалар-үҫмерҙәр телеканалы хуплап ҡаршы алып, ғәмәлгә ашырыуҙа әүҙем булышлыҡ күрһәтә.
Республикабыҙ халҡы һәм башҡорт телен яратҡан барса кеше ике аҙна дауамында үҙҙәренә оҡшаған иң матур башҡорт һүҙҙәрен тәҡдим итте. Сайтҡа меңдән ашыу тәҡдим килгән.
Әлеге ваҡытта тәүге урындарҙы ошо һүҙҙәр биләй (һүҙҙәр алфавит тәртибендә төҙөлгән):
1. Атай.
2. Йөрәккәйем.
3. Йән.
4. Йәнтөйәк.
5. Ҡот.
6. Намыҫ.
7. Өмә.
8. Сабыр.
9. Тылсымлы.
10. Хыял.
11. Һөйәм.
12. Әсәй.
Әле bashslovo.ru сайтында иң-иң матур башҡорт һүҙе өсөн дәррәү тауыш биреү бара. 14 декабрҙә, Башҡорт теле көнөн билдәләгәндә, еңеүсене беләсәкбеҙ. Проекттың авторы – Рөстәм Аҙнабаев.

#БашҡортТеле2020

#Баштел2020

Фото: ok.ru