Урта һөнәри белем биреү йорттары студенттары ла олимпиадала ҡатнашты

Башҡортостандың урта һөнәри белем биреү йорттары студенттары араһында башҡорт теле һәм әҙәбиәте буйынса республика олимпиадаһы үтте. Башҡорт теле йылына, 14 декабрҙә билдәләнгән Башҡорт теле көнөнә арналып Мәғариф һәм фән министрлығы тарафынан ойошторолған сара 25-27 ноябрҙә булды.

Олимпиада ике йүнәлештә – башҡорт телен туған тел һәм дәүләт теле булараҡ өйрәнгән студенттар араһында айырым үткәрелде. Ул өс өлөштән торҙо. Тәүге турҙа студенттар тест һорауҙарына яуап бирҙе, икенсеһендә билдәләнгән темаға инша яҙҙы, өсөнсөһөндә проекттарын яҡланы.

Башҡорт теленән олимпиадала быйыл 66 махсус һөнәри белем биреү ойошмаһынан525 талип ҡатнашҡан (былтыр уларҙы һаны 116 булған).

Башҡорт телен туған тел булараҡ өйрәнгән студенттар араһында Нефтекама нефть колледжынан Зөлфиә Ғаязова, ә дәүләт теле булараҡ уҡығандарҙан Өфө күп йүнәлешле һөнәри колледжы студенты Эльвина Хәбирова еңеүселәр булып танылған. Шулай уҡ алдынғы урын яулағандар араһында Сибай, Өфө, Бәләбәй, Ишембай, Нефтекама, Стәрлетамаҡ, Октябрьский ҡалаларында урынлашҡан, уңышлы эшләп килгән төрлө йүнәлештәге уҡыу йорттары студенттары бар.

Бөгөн Башҡортостан колледждарында белем алған студенттарҙың 33524-е башҡорт телен – дәүләт теле, 7297-һе туған тел булараҡ өйрәнә.

#БашҡортТеле2020

#Баштел2020