Уҡбалыҡтар - Павловка һыуһаҡлағысында

Яңыраҡ Павловка һыуһаҡлағысына биш меңдән ашыу уҡбалыҡ селбәрәһе ебәрелгән. Сара һыуҙың биологик сығанаҡтары балансын һаҡлауға йүнәлтелгән һәм төбәктә “Экология” милли проектын бойомға ашырыуға булышлыҡ итә.

Сарала ведомство вәкилдәре, шулай уҡ Балыҡсылыҡ буйынса федераль агентлыҡтың Урта Волга территориаль идаралығы хеҙмәткәрҙәре лә ҡатнашты.

Башҡортостан Тәбиғәттән файҙаланыу һәм экология министрлығының Тәбиғәттән файҙаланыу программаларын ғәмәлгә ашырыу бүлеге белгесе Екатерина Гребенщикова һүҙҙәренсә, өс грамға тиклем үҫтерелгән селбәрәләр Силәбе өлкәһенең “Аквакультура” балыҡсылыҡ йәмғиәтенең инкубация цехынан алынған. Уларҙы махсус һауыттарҙа уңышлы алып килеп, Ҡариҙел районы Павловка ауылындағы Павловка һыуһаҡлағысына төшөргәндәр.

Шулай уҡ быйыл алдараҡ, компенсация саралары нигеҙендә, Павловка менән Түбәнге Кама һыуһаҡлағыстарына бөтәһе 225 меңдән ашыу һаҙан һәм уҡбалыҡ селбәрәләре төшөрөлгән.

#Миллипроекттар

Фото: Башҡортостан Республикаһының Тәбиғәттән файҙаланыу һәм экология министрлығынан алынды.