Конкурс иғлан ителде

Башкортстандың милли геройы, 112-се Башҡорт кавалерия дивизияһы (16-сы Гвардия) командиры, Рәсәй Геройы, генерал-майор Миңлеғәле Шайморатовҡа Өфө ҡалаһының Совет майҙанында һәйкәл урынлаштырыу өсөн иң яҡшы проектҡа асыҡ конкурс иғлан ителде.
Конкурста профессиональ скульпторҙар һәм автор коллективтары ҡатнаша ала. Конкурс шарттарына ярашлы, архитекторҙар һәйкәлде урындағы композицияға яраҡлаштырып эшләргә тейеш. Ғариза граждандар берләшмәһе исеменән бирелһә, конкурста ҡатнашыу өсөн вәкәләтле бер вәкилде делегат итеп һайларға кәрәк.
Бәйге бер турҙа уҙғарыласаҡ. Конкурсант һәйкәлдең 40 сантиметрҙан да ҙур булмаған үлсәмдәге өс үлсәүле моделен, шулай уҡ һыҙмаһын, аңлатыу тексын, сығымдар сметаһын тәҡдим итергә тейеш. Һын композицияһын һәйкәл ҡуйыу урыны менән бәйләү һәм проекттың график өлөшөн башҡарыу өсөн конкурста ҡатнашыусының архитектор йәлеп итеүе шарт итеп ҡуйыла.
Һәйкәлде урынлаштырыу урыны - Өфө ҡалаһының Совет майҙаны. Конкурста ҡатнашыу өсөн ғаризалар һәм материалдар 2020 йылдың 20 ноябренә тиклем “Торатау” Конгресс-холында, Өфө ҡалаһы, Зәки Вәлиди урамы, 2 адресы буйынса директорҙың ҡабул итеү бүлмәһендә эш көндәрендә иртәнге сәғәт 9-ҙан киске 6-ға тиклем ҡабул ителә. Бәйләнеш өсөн телефон - (347) 276 55 00, Гөлдәр Сабитоваға мөрәжәт итергә.
Конкурс материалдарын махсус комиссия тикшерәсәк.
Фото: “Башинформ”дан алынды.