Уҡытыусы! Ниндәй бөйөк исем!

Уҡытыусы донъялағы иң хөрмәтле, ауыр һәм яуаплы һөнәрҙәрҙең береһе. Бөгөн балалаларға белем биреүгә бөтә күңелен, тырышлығын һәм ваҡытын һалған педагогтар ҡотлауҙар ҡабул итә. Уҡытыусылар көнө уңайынан мәғариф идаралығында уҙғарылған тантаналы сарала ҡала хакимиәте башлығы Игорь Миронов ҡаланың бер төркөм мәғариф хеҙмәткәрҙәренә наградалар тапшырҙы.

- Мин һеҙҙе һөнәри байрамығыҙ - Уҡытыусылар көнө менән ҡотлайым. Һеҙ балаларҙың шәхес булараҡ үҫешендә мөһим роль уйнайһығыҙ. Балалар менән эшләү еңел түгел, әммә һеҙ уларҙың күңеленә юл таба беләһегеҙ. Беҙҙең ҡаланың, республиканың һәм илдең потенциалы, киләсәге - һеҙҙең ҡулдарҙа. Мин һеҙгә ныҡлы һаулыҡ, именлек, һөнәри үҫеш теләйем, - тине үҙенең ҡотлау һүҙендә Игорь Геннадьевич.
Тантаналы сарала ҡала хакимиәтенең Рәхмәт хаттары, Рәсәй Федерацияһы Мәғариф министрлығының Маҡтау грамоталары, «Рәсәй Федерацияһы мәғариф өлкәһенең почетлы хеҙмәткәре» исемдәре һәм «Башҡортостан Республикаһы ойошторолоуға 100 йыл» юбилей миҙалдары тапшырылды. Тулыраҡ «Салауат» гәзитенең киләһе һанында уҡырһығыҙ.