"Юлдаш" һөйләй, "Юлдаш" тыңлай!

25 сентябрҙә йырлы-йоңло “Юлдаш” каналының тыуған көнө. Ул Башҡортостан радиоһы нигеҙендә 2000 йылдың 25 сентябрендә эш башлай. “Юлдаш”ты республикала, күрше өлкәләрҙә, шулай уҡ Интернет селтәре аша бөтә донъяла тәүлек әйләнәһенә тыңларға мөмкин. Бөгөн был радиоканалды ике миллиондан ашыу кеше тыңлай, айырыуса уны ауыл ерендә яраталар һәм үҙ итәләр.

"Юлдаш"тың маҡсаты - тыңлаусыларҙы оператив һәм көнүҙәк мәғлүмәттәр менән тәьмин итеү, күңел асыу тапшырыуҙары аша аң-белем таратыу, аудиторияның социаль әүҙемлеген уятыу, кешеләрҙе ыңғай маҡсаттарға йүнәлтеү. Шулай ҙа эфирҙың ҙур өлөшөн һәр кемдең зауығына яуап бирерҙәй йыр-моң тәшкил итә. Күптәр радионы һуңғы яңылыҡтарҙы белеү өсөн тоҡандырһа, аналитик һәм күңел асыуға ҡоролған тапшырыуҙарҙы үҙ иткәндәр ҙә байтаҡ.

Радио хеҙмәткәрҙәренең эшмәкәрлеге эфирҙан тыш та дауам итә. Улар республика буйлап сәфәрҙәргә сығып тыңлаусылары менән осраша, мәрхәмәтлек акциялары, байрам саралары үткәрә, шефлыҡ ярҙамы күрһәтә. “Юлдаш йыры” республика конкурсын үткәреү изге йолаға әүерелеп китте. Ун йыл эсендә унда 500-ҙән ашыу үҙешмәкәр артист ҡатнашты, улар йөҙҙән ашыуы конкурстың лауреаттары һәм еңеүселәре булды һәм республиканың ҙур сәхнәһенә юллама алды.

Профессиональ башҡарыусылар араһында “ЮлдашХит” йыр фестивале бик популяр. Был проект башҡорт эстрадаһы үҫеше күрһәткесе булып тора, сөнки төп яңы йырҙар тәү сиратта “Юлдаш”тың хит парады аша үтә.

Республиканың төп радиоканалы өс тапҡыр Волга буйы федераль округында иң яҡшы радиостанция, бик күп бөтә Рәсәй һәм республика конкурстары, шул иҫәптән "Рәсәй патриоттары" конкурсының, "Кавказ тауышы" Бөтә Рәсәй радиофестиваль дипломанты еңеүсеһе булып танылған.

20 йыл дауамында халыҡҡа ихлас хеҙмәт иткән радиоканал “Беҙ бергә” тигән девиз аҫтында эшләй.

“Юлдаш”тар тамашасыһы өсөн сюрприз да әҙерләгән: 21-нән 27 сентябргә тиклем эфирҙа радионың тәүге алып барыусылары эшләйәсәк. Улар Нурия Абдуллина, Зифа Нагаева, Рөстәм Ғиззәтуллин, Ләйсән Сәйфетдин, Фирҙәт Ғәлиев, Зөлфиә Рәхмәтуллина һәм башҡалар. Иртәнге тапшырыуҙарҙы Наил Йосопов менән Марсель Байдәүләтов алып барасаҡ. “Асыҡ студия” аналитик тапшырыуының ҡунағы булып компанияның 2000 йылдар башындағы генераль директоры Рәмис Дәүләтбаев торасаҡ. "Юлдаш"тың сюрприздары бының менән генә сикләнмәй. Күп ҡунаҡтар буласаҡ, тыңлаусыларҙы һәм радиоканал хеҙмәткәрҙәрен дә күп бүләктәр көтә.

Фото: "Бәйләнештә" селтәренән.