Һаумы, мәктәп!

Бөгөн ҡаланың бөтө белем биреү ойошмаларында ла Белем көнө уҙҙы. Тик ғәҙәти булмаған шарттарҙа. Сараға 1, 9 һәм 11 класс уҡыусылары ғына саҡырылды. Тантаналы сара 23-сө мәктәптә уҙҙы. Унда ҡала хакимиәте башлығы Игорь Миронов, Рәсәй Федерацияһы Дәүләт думаһы депутаты Зариф Байғусҡаров, саҡырылған ҡунаҡтар ҡатнашты.

-Ҡәҙерле уҡыусылар, хөрмәтле уҡытыусылар, ата-әсәләр! Яңы уҡыу йылы башланыу менән ҡотлайым! Айырыуса был көн бәләкәстәр - 1 класс уҡыусылары өсөн иҫтәлекле. Улар бөгөн беренсе тапҡыр мәктәп тупһаһы аша үтеп, парта артына ултырасаҡ. Барығыҙға ла ныҡлы һаулыҡ, сабырлыҡ, түҙемлек теләйем. Был уҡыу йылы мауыҡтырғыс, күңелле ваҡиғаларға бай булһын, - тип сығыш яһаны Игорь Миронов.

Зариф Байғусҡаров та ҡотлау сәләмен еткерҙе.

- Хөрмәтле уҡытыусылар, ата-әсәләр, уҡыусылар! Был көндө барыбыҙ ҙа тулҡынланып көттөк. 1-се класс уҡыусылары мәктәпкә барырҙармы, әллә өйҙә генә ҡаршыларҙармы тип хафаландыҡ. Республика Башлығы Радий Хәбиров шундай ҡарар ҡабул итте: балалар мәктәпкә барырға тейеш! Был улар өсөн ғүмерҙәрендә бер тапҡыр була торған мөһим ваҡиға. Барыһына ла түҙемлеке, сәләмәтлек теләйем, - тине Зариф закир улы.

Был турала ентеклерәк гәзиттең киләһе һанында уҡығыҙ.