Урман янғындарын иҫкәртеү өсөн

“Экология” милли проекты сиктәрендә ҡабул ителгән “Урмандарҙы һаҡлау” төбәк проекты буйынса “Башҡортостан Республикаһының урман янғындарын иҫкәртеү һәм ликвидациялау үҙәге” учреждениеһына ветролет төрөндәге дүрт пилотһыҙ осоусы аппарат – “DJI Mavic 2 Enterprise” квадрокоптерҙары һатып алынған. Был техника видеокамералар һәм урман биләмәләрендә уттарҙы асыҡлаусы тепловизорҙар менән йыһазландырылған.

- Өҫтәмә ҡорамалдың төрлөлөгө – видео һәм йылылыҡты асыҡлаусы камералар, прожекторҙар, репродуктор һәм башҡалар. Улар үтеүе ауыр булған урындарҙа эшләү мөмкинлеге бирә. Хәҙер белгестәр тәбиғәт янғындарын тиҙерәк таба аласаҡ һәм урман янғынын һүндереүҙең һөҙөмтәлеген билдәләй аласаҡ. Был иһә янғындарҙы тиҙерәк һүндереү, уның күләмен билдәләү, уттың ҡайһы яҡҡа йүнәлгәнен асыҡлау, янғын һүндереү техникаһына барыу юлын табыу мөмкинлеген тыуҙырасаҡ, – ти Янғын һүндереү үҙәге директоры Айрат Йосопов.

#Миллипроекттар

Фото: БР Урман хужалығы министрлығы сайтынан алынды.