Дезинфекциялау дауам итә

Республиканың район-ҡалаларында йорт алдарын, подъездарҙы, урамдарҙы, тротуарҙарҙы дезинфекциялау дауам итә. Был маҡсатҡа аҡса идара итеүсе компания һәм ойошмаларға ярҙам йөҙөнән республика бюджетынан бүленгән.

Муниципалитеттарға “Башфармация” аша 15 меңгә яҡын битлек, комбинезон, бирсәткәләр, 10 мең пар итек һәм һаҡлаусы күҙлекләр, 2 мең һиптергес һәм 16 мең литр дезинфекциялау сараһы бүленгән. Шыйыҡлатҡас, был 15 миллион литрға тиң. Ул сентябргә тиклем ихтыяжды ҡаплай.

Башҡортостандың Торлаҡ һәм төҙөлөш буйынса дәүләт комитеты йорттарҙы һәм подъездарҙы дезинфекциялауҙы контролдә тота. 1 апрелдән 6 меңгә яҡын подъезд тикшерелгән. Тикшереүҙәр барышында киҫәтеүҙәр яһалмаған. Торлаҡ-коммуналь хужалыҡ министрлығы вәкилдәре лә тикшереүҙәр үткәреп тора.

Республикала көн һайын 2 меңдән ашыу ихата һәм 15 мең подъезға дезинфекция үткәрелә. Регламентҡа ярашлы, подъездар аҙнаһына ике тапҡыр, ә кесе архитектура формалары аҙнаһына бер тапҡыр дезинфекцияланырға тейеш. Бындай саралар ошонан да һирәгерәк булырға тейеш түгел.

Автор фотоһы.