Эшҡыуарҙар офислы булды

Бөгөн, 14 июлдә, Өфөлә Башҡортостан Башлығы Радий Хәбиров, Рәсәй Президенты ҡарамағындағы Эшҡыуарҙарҙың хоҡуғын яҡлау буйынса вәкил Борис Титов һәм төбәк бизнес-омбудсмены Флүр Әсәҙуллин баш ҡаланың Ленин урамы, 5/3 адресы буйынса урынлашҡан Эшҡыуарҙар өсөн йәмәғәт ҡабул итеү бүлмәһен асыу тантанаһында ҡатнашты.

Яңы офис бөтә республика эшҡыуарҙары өсөн аналитика һәм консультация үҙәге бурысын башҡарасаҡ. Эксперттар, юристар, адвокаттар, уңышлы эшҡыуарҙар түләүһеҙ нигеҙҙә йүнселдәргә ярҙам алыу, уларҙың хоҡуҡтарын һәм законлы мәнфәғәттәрен яҡлау мәсьәләләрендә булышлыҡ итәсәк.

Республика Башлығы офисты ҡарап сыҡты, белгестәрҙең эш шарттары менән танышты. Радий Хәбиров эшҡыуарҙар хоҡуҡтарын яҡлау буйынса тулы хоҡуҡлы вәкилдәре бөгөн Башҡортостандың барлыҡ муниципалитеттарында ла бизнес-шерифтар менән тығыҙ бәйлнештә булыуҙарын билдәләне. Был республикала уңайлы һәм хәүефһеҙ бизнес-мөхит булдырырыға ярҙам итәсәк.

Фото: https://glavarb.ru/rus/