Башланғыс та, еңеү ҙә бар

Быйыл беҙҙең ҡаланан Урындағы башланғыстарға ярҙам итеү проекттары конкурсына тапшырылған 46 ғаризаның бөтәһе лә еңеү яулаған. Был хаҡта ҡала хакимиәте башлығы Игорь Миронов социаль селтәрҙәге үҙенең сәхифәһендә хәбәр итте.

Был проект башланғыстарҙы тормошҡа ашырыу өсөн республика, ҡала бюджеттарынан финанслауҙы һәм халыҡтың ҡатнашлығын күҙ уңында тота. Ә был 40 млн һумдан ашыу аҡса күп кенә көнүҙәк мәсьәләләрҙе хәл итеүгә йәлеп ителәсәк, тигән һүҙ. Урындағы башланғыстарға ярҙам итеү программаһы буйынса быйыл Салауаттың күп кенә мәғариф, мәҙәниәт учреждениеларында ҡыйыҡтар ремонтланасаҡ, иҫке тәҙрәләр алыштырыласаҡ, асфальттары йөпләнәсәк. балалар, спорт майҙансыҡтары барлыҡҡа киләсәк. Проектта еңеүселәр араһында бер тапҡыр ғына ҡатнашмаусылар ҙа бар. Улар программаның һөҙөмтәһен юғары баһалай. Битараф булмай, башланғыс менән сығыуҙа активлыҡ күрһәткәндәргә рәхмәт, хәҙер проекттарҙы тормошҡа ашырырға ғына ҡалды, тип яҙа Игорь Геннадьевич.