Уйын аша белемеңде иҫбатла

«Уйын - белем туплау өсөн иң яҡшы алым», - ти билдәле интеллектуаль уйынсы Максим Поташев. Тап ул «Рәсәй: кешеләр, һандар, факттар» яңы онлайн-викторина һорауҙарының мөхәррире булып тора. Был уйын Бөтә Рәсәй халыҡ иҫәбен алыу сайтында бара. Унда һәр теләгән кеше ҡатнаша ала. Иң оҫта яуап биреүсе аҡсалата бүләк аласаҡ.

Онлайн-викторина 15 июндә башланды һәм уны үткәреү ваҡыты сикле, яуаптар 19 июнгә тиклем ҡабул ителә. Уйын 85 һорауҙан тора, ул ил төбәктәре һанына тап килә. Һорауҙар халыҡ иҫәбе, статистика, ил төбәктәре тураһындағы ҡыҙыҡ факттарға, шулай уҡ үткән халыҡ иҫәбе алыуҙар тарихына бәйле.
Уйында ҡатнашыу өсөн strana2020.ru сайтында теркәлергә кәрәк. Унан һуң тәҡдим ителгән һорауҙарға яуап бирергә була. Иң ҡыҫҡа ваҡыт эсендә иң күп һорауҙарға дөрөҫ яуап биргән өс кеше еңеүсе буласаҡ. Һәр еңеүсегә 7000 һум күләмендә аҡсалата приз бирелә.