Ыуалыусан нимәләргә һаҡсыл ҡараш

Бер ауылға ситтән килеп аҡыл эйәһе йәшәй башлаған. Ул балаларҙы бик яратҡан, бик күп ваҡытын улар менән үткәргән. Шулай уҡ ҡарт малай һәм ҡыҙҙарға тиҙ ыуалыусан әйберҙәр бүләк иткән.

Балалар ул уйынсыҡтар менән нисек кенә һаҡ уйнарға тырышмаһын, уларҙы тиҙ ватҡан. Сабыйҙарҙың шул саҡ кәйефтәре төшкән һәм илаған. Бер аҙ ваҡыт үтеүгә аҡыл эйәһе балаларға тағы ла бүләктәр биргән, тик улары унан да нығыраҡ нескәрәк булған.
Ата-әсәләр түҙмәгән, ҡартҡа килеп былай тип һорау биргән:
- Һин аҡыллы кеше һәм беҙҙең балаларға ла изгелек кенә теләйһең. Әммә ни өсөн уларға шундай бүләктәр бирәһең? Балалар нисек кенә тырышмаһын, уйынсыҡтар ватыла һәм улар илай. Ә бит был әйберҙәр шундай матур, улар менән уйнамау мөмкин түгел.
- Бер нисә йыл үтер, - тип йылмая ҡарт, - һәм уларға кемдер үҙенең йөрәген бүләк итер. Ә әлеге балалар ул ваҡытҡа иң ҡәҙерле әйберҙәргә ҡарата әҙ генә булһа ла һаҡсыл булырға өйрәнер.

Фото: www.mywellnesshub.in