Ҡала сәскәләргә күмелә

Һәр ҡала өсөн уның сәскәләргә күмелеп ултырыуы - матур күренеш. Аллеяларҙа, скверҙарҙа сағыу төҫтәр менән балҡып улытрған сәскәләрҙе күреп нисек күңел шатланмаһын! Салауатта сәскә ултыртыу май башында уҡ башланды һәм әле лә дауам итә.
Бөгөн «Флора» предприятиеһы хеҙмәткәрҙәре «Ағиҙел» мәҙәни-ял үҙәге артында сәскәләр ултырта. Быға тиклем дә улар башҡарған эш күләме бихисап, «Мәңгелек ут», Батыл аллеяһы, Обелиск һәйкәле яны уларҙың тырышлығы менән сағыу гөлдәргә күмелгән. «Флора» барлығы ҡала буйынса 5500 квадрат метрҙан ашыу майҙанда сәскә ултыртырға тейеш.
Ойошманың агрономы Гәүһәр Ғәлиәкбәрова һөйләүенсә, улар сәскәләрҙе ултыртыр алдынан ерҙе яҡшы итеп әҙерләгән, түтәлдәрҙе ҡаҙған, ашламалар ҡушҡан, тигеҙләгән. Беҙ башлыса цинерарии, бәрхәт, аҡ һәм ҡыҙыл петуниялар ултыртабыҙ, ти Гәүһәр Рәсүл ҡыҙы. Һуңынан был сәскәләрҙе ҡарау ҙа «Флора» предприятиеһы өҫтөндә. Агроном ҡала матурлығы, уның халҡы өсөн ултыртылған сәскәләрҙе урламауҙарын да үтенде.