Аҡса урлауға юл ҡуймаҫҡа

Башҡортостан Башлығы Радий Хәбиров Рәсәй Именлек Советы Секретары Николай Патрушев менән ил Президентының Волга буйы федераль округындағы тулы хоҡуҡлы вәкиле Игорь Комаровтың видеоконференцэлемтә тәртибендә үткәрелгән берлектәге ултырышында ҡатнашты.

Ултырышта милли проекттарҙы тормошҡа ашырыу барышындағы хоҡуҡ боҙоуҙарға ҡаршы эш итеү буйынса өҫтәмә сараларға бәйле мәсьәләләр тикшерелде. Кәңәшмәлә ҡатнашыусылар бюджет аҡсаһын файҙаланыуға контролде көсәйтеүгә, милли проекттарҙы бойомға ашырғанда аҡса урлауға юл ҡуймауға айырым иғтибар бирҙе, хоҡуҡ һаҡлау, контроль-күҙәтеү ведомстволарының, төбәк власть органдарының һәм урындағы үҙидараның ғәмәлдәрен көйләүҙең мөһимлеген билдәләне.

Игорь Комаровтың әйтеүенсә, ошо өлкәлә законлылыҡты һәм хоҡуҡ тәртибен тәьмин итеү буйынса бурыстарҙы тормошҡа ашырыу ҙур әһәмиәткә эйә. Ултырышта шулай уҡ халыҡты тәбиғи һәм техноген ғәҙәттән тыш хәлдәр сығыу хәүефенән һаҡлау мәсьәләләре буйынса фекер алыштылар.

#Миллипроекттар