Бик урынлы ярҙам

Рәсәй Президенты Владимир Путин граждандарға ярҙам күрһәтеү йәһәтенән яңы саралар тураһында иғлан итте. Иң элек улар балалы ғаиләләргә ҡағыла. Өс йәштән 15 йәшкә тиклемге һәр балаға 10-ар мең һум аҡса түләнә. Владимир Путин шулай уҡ өс йәшкә тиклемге балаһы булған ғаиләләргә апрель, май, июнь айҙарына биш мең һум күләмендә айлыҡ түләү билдәләне. Рәсәйҙәге 27 миллион балаға ярҙам күрһәтеләсәк.

БР Дәүләт Йыйылышы-Ҡоролтай депутаты Руфина ШАҺАПОВА быға ҡарата үҙ фекерҙәрен еткерҙе:
- Әлбиттә, мин Рәсәй Президентының был аҙымын тулыһынча хуплайым. Бөгөн ғаиләләргә ярҙам айырыуса мөһим. Уны, матди хәлдәренә ҡарамаҫтан, бөтә ғаиләләрҙең дә алыуы маҡтауға лайыҡ. Был бик ваҡытлы һәм етди ярҙам, тип иҫәпләйем. Беҙ был көндәрҙә төрлө ғаиләләр менән аралашабыҙ, араларында күп балалылар ҙа бар. Әлбиттә, улар бындай ярҙам өсөн бик рәхмәтле.
Тағы шул, күп балалар был аҡсаға нимә алырға икәнлеген үҙҙәре планлаштыра. Улар бик аҡыллы һәм зиһенле бөгөн, Президент аҡсаны тап улар өсөн бүлүен беләләр. Шулай булғас, балалар үҙҙәренә кәрәкле әйберҙәр тураһында һүҙ йөрөтә, әйтәйек, уҡыу өсөн мотлаҡ булған планшеттар алырға теләүселәр күп. Әлеге үҙ аллы изоляция осоронда был гаджеттарҙың етешмәүе үҙен ныҡ һиҙҙерҙе.
Ҡыҫҡаһы, 10 мең һум аҡсаның иң кәрәкле әйберҙәр өсөн генә тотоноласағына бер шигем дә юк", - тине ул.

Кәримә, йәш әсә.

- 10 йәшлек улымды яңғыҙ тәрбиәләйем. Әлеге еңел булмаған осорҙа был ярҙам бик кәрәкле һәм урынлы тип иҫәпләйем.