Бәхетле киләсәк бүләк иткән ветерандарға - дан һәм хөрмәт!

Салауат ҡалаһы прокуроры Евгений Иванов ветерандарҙы Еңеү байрамы менән ҡотлай.

Хөрмәтле ветерандар! Һеҙҙең барығыҙҙы ла ҙур байрам - Бөйөк Еңеү көнө менән ҡотлайым! Был көн дәүләтебеҙ өсөн Дан һәм ғорурлыҡ көнө, Тыуған илде сикһеҙ яратыу, халҡыбыҙ батырлығының, ҡаһарманлығының, һынмаҫ ихтыярының һәм ғәйәт ҙур рухи көсөнөң кәүҙәләнеше булып ҡаласаҡ.
Бөйөк Ватан һуғышы йылдарында прокуратура, юстиция һәм суд органдары фәҡәт илебеҙ оборонаһы мәнфәғәттәрендә эшләгән. Бөйөк Еңеүгә республиканың, шул иҫәптән Салауат ҡалаһының прокуратура хеҙмәткәрҙәре лә ҙур өлөш индергән. Зәки Насип улы Булгаков Салауатта 1956 - 1963 йылдарҙа проекурор вазифаһын башҡара. 1940 йылда армия сафтарына алына. Немец-фашист илбаҫарҙарына ҡаршы көрәштә ҡаһарманлыҡ, батырлыҡ күрһәткәне өсөн II дәрәжә Ватан һуғышы ордены менән бүләкләнгән. 1941 - 1945 йылдарҙағы Бөйөк Ватан һуғышында Еңеүҙең юбилей миҙалдары менән дә бүләкләнә. 1995 йылда Жуков миҙалы менән наградлана.
1966 - 1981 йылдарҙа ҡала прокуроры булған Андрей Тимофеевич Никитенко Совет Армияһы сафтарына 1942 йылда 17 йәшенд алына. 1943 йылда фронтҡа ебәрелә, станок пулеметы командиры була. Юстицияның өлкән советнигы А. Т. Никитенко бик күп хөкүмәт наградалары, шул иҫәптән - I дәрәжә Ватан һуғышы ордены һәм „1941 - 1945 йылдарҙағы Бөйөк Ватан һуғышында Германияны еңгән өсөн“ ордены менән бүләкләнә.
Беҙ еңеүселәр быуыны менән ғорурланабыҙ, уларҙың батырлығын һәм ҡаһарманлығын онотмайбыҙ. Еңеү рухы беҙҙе яңы үрҙәргә һәм ҡаҙаныштарға әйҙәй. Тыуған илебеҙҙең азатлығы һәм бойондороҡһоҙлоғо өсөн көрәшкән ветерандар алдында баш эйәбеҙ, уларға сикһеҙ рәхмәтебеҙҙе белдерәбеҙ. Һеҙгә һәм яҡындарығыҙға ныҡлы һаулыҡ, бәхет теләйбеҙ.