Транспорт сығымдарына субсидия

Тышҡы иҡтисади бәйләнештәр буйынса дәүләт комитетынан хәбәр итеүҙәренсә, республикала сит илгә тауар оҙатҡан предприятиеларҙың транспорт сығымдарын ҡаплау өсөн субсидия юллауға ғаризалар ҡабул ителә.

Экспорт эшҡыуарлығын яҡлауға йүнәлтелгән әлеге сара “Халыҡ-ара кооперация һәм экспорт” милли проектының “Башҡортостан Республикаһында экспортты үҫтереү” төбәк проектына ярашлы икенсе йыл рәттән тормошҡа ашырыла.

“Бөгөнгө көндәге хәл-торошҡа, шул иҫәптән коронавирустың таралыуына бәйле, программа Башҡортостан иҡтисадының тотороҡлолоғон нығытыу буйынса тәү сиратта ғәмәлгә ашырылырға тейешле саралар исемлегенә индерелде”, - тип билдәләне дәүләт комитетының матбуғат секретары Илгизәр Санъяров.

Программала 2019 йылдың 1 ноябренән һуң үҙе етештергән продукцияны экспортҡа оҙатҡан предприятиелар ҡатнаша ала. Матди ярҙамдың максималь күләме – 2 миллион һум. Субсидия алыу шарттары менән комитеттың рәсми сайтында танышырға мөмкин.

#Миллипроекттар