Тыуған көнөндә... һөйгәненең ғүмерен ҡыйған

20 апрелдә Туймазы ҡалаһында теркәлгән аяныслы ваҡиға тураһында Башҡортостан Республикаһы буйынса Тәфтиш комитеты хәбәр итә.

Бер ир тыуған көнөн билдәләргә тип һөйгәне янына килә. Әлбиттә, улар мул ғына табын ҡороп, иҫерткес эсемлектәр ҡуллана. Тик һуңынан ни сәбәптәндер икәү араһында ғауға сыға. Ҡыҙып алған ир ҡулына бысаҡ алып, бер нисә тапҡыр ҡатындың муйынына, күкрәгенә сәнсә. Уныһы ауыр тән йәрәхәттәре ала һәм ваҡиға урынында йән бирә.

Кеше ғүмерен ҡыйған ир тиҙ арала енәйәт урынын ҡан эҙҙәренән таҙартып, полиция органдарына хәбәр итеп, һөйгәнен фатирында үле килеш табыуын белдерә.

Тәфтишселәр тикшереү үткәреп, һөҙөмтәлә һәләк булған ҡатынға фажиғә көнөндә тик һөйгәне генә килеүен асыҡлай. Улар енәйәт ҡылынған урынды тикшергәндә ҡан эҙҙәренә юлыға, ғәйепләнеүсенең аяҡ эҙҙәрен таба. Ир алып килгән араҡы шешәһендә лә эҙҙәр була.

Һөҙөмтәлә ир үҙ ғәйебен тулыһынса таныған.

Фото: datingfox.com