Коронавирус пандемияһы ваҡытында армияға саҡыралармы?

Мәғлүм булыуынса, Рәсәй Президентының 30 марттағы указына ярашлы, 1 апрелдән 15 июлгә тиклем хәрби хеҙмәткә саҡырыу компанияһы үтәсәк. Коронавирус был мөһим сараға ла үҙенең тәртибен индерә. Ошо йәһәттән Башҡортостандың хәрби комиссариатында һаҡланыу буйынса махсус саралар күрелә.

- Республиканың хәрби комиссариаттарында, саҡырыу пункттарында, хәрби часҡа барыу юлында хәүефле инфекцияны иҫкәртеү һәм уны таратыуға юл ҡуймау буйынса бөтә саралар ҙа күреләсәк. Пунктҡа килгәндәрҙең тән температураһы үлсәнәсәк, - тип белдерҙе республиканың хәрби комиссары Игорь Харченко.

Бынан тыш көн һайын бөтә биналарҙа ла һауаны зарарһыҙландырыуҙа бактерицид нурландырыу ҡулланыласаҡ. Саҡырыу пунктында призывниктарға шәхси гигиена әйберҙәре һалынған махсус контейнер һәм битлек биреләсәк.

Хәрби часҡа килгәндәргә 14 көнлөк карантин ҡаралған. Был осорҙа улар айырым казармаларға урынлаштырыласаҡ, шулай уҡ туҡланыу һәм уҡыу башҡа хәрбиҙәрҙән айырым алып барыласаҡ. Яңы килгән һалдаттарҙың тән температураһын тәүлегенә өс тапҡыр үлсәп тороу ҡаралған. Респиратор ауырыу билдәләре булған йәш һалдаттарҙы шунда уҡ айырым урынлаштырасаҡтар һәм тейешле медицина саралары күреләсәк.

Һалдат бурысын үтәгәндәр үҙ ваҡытында өйҙәренә ҡайтарыласаҡ, әммә улар ҙа ҡаты инструктаж үткәс кенә тыуған яҡтарына юл тотасаҡ.

Мәғлүм булыуынса, быйылғы яҙғы саҡырылышта ресупубликанан биш меңдән ашыу егеттең армия сафын тулыландырыуы көтөлә. Хәрби хеҙмәткә оҙатыу 20 майҙа башланырға тейеш.

Фото: Chesnok.media

Автор: Рәмилә Мусина ("Башҡортостан" гәзитенән) https://bash.rbsmi.ru/articles/y-m-i-t/Koronavirus-pandemiya-i-va-itinda-armiya-a-sa-iralarmi-198777/