100 кеше яуаплылыҡҡа тарттырылған

Салауат 16 марттан “Үлем менән ҡайҙа һатыу итәләр, хәбәр ит” Бөтә Рәсәй наркотиктарға ҡаршы акцияһына ҡушылды. Ул 27 мартҡа тиклем дауам итә.
Был акция наркоманияның таралыуын иҫкәртеү, наркотик һәм психотроп матдәләрҙең законһыҙ әйләнешен асыҡлау һәм халыҡты наркотиктарҙы ҡулланыу эҙемтәләре менән таныштырыу маҡсатында үткәрелә.
Ошо осорҙа наркотиктарҙы етештереү, ҡулланыу, уның менән һатыу итеү, наркомандарҙың притондары һәм башҡа оператив-әһәмиәтле мәғлүмәт тураһында белгән һәр кем был турала РБ Эске эштәр министрлығының (8(347) 279-32-92) ышаныс телефонына, йә ҡала эске эштәр бүлегенең дежур бүлегенә102, (83476) 35-25-58 телефонына шылтыратып хәбәр итә ала. Мәғлүмәтте аноним рәүештә ҡалдырырға мөмкин.
Салауат эске эштәр идаралығынан хәбәр итеүҙәренсә, былтыр беҙҙең ҡалала наркотиктарҙың законһыҙ әйләнешенә бәйле 280 енәйәт теркәлгән. Уларҙың өстән ике өлөшө һатыу менән бәйле. 7,5 килограмм наркотик матдә тартып алынған, 100 кеше енәйәт яуаплылығына тарттырылған.