Мәктәптәрҙе нимә көтә?

Балалар баҡсалары, мәктәптәр, төрлө уҡыу йорттары студенттары нисек уҡыр? Был турала Хөкүмәттә үткән оператив кәңәшмә ваҡытында республиканың мәғариф министры Айбулат Хажин һөйләне.

Бөгөндән, 23 марттан алып 1 апрелгә тиклем Башҡортостанда мәктәп уҡыусылары өсөн каникулдар дауам итә. 2 апрелдән башлап мәктәптәр дистанциялы белем алыуға күсәсәк. Ошо ваҡытҡа тиклем барлыҡ мәктәптәр йөҙ процент менән был башланғысҡа әҙер булырға тейеш.

- Илдең Мәғариф министрлығы кәңәше буйынса дәрестәр ярты сәғәт дауам итәсәк. Иртәгәнән башлап 1 апрелгә тиклем педагогтарҙы дистанциялы белем биреүгә өйрәтәсәктәр. Әлеге эш өсөн ҡыҙыу бәйләнеш булдырылған, уның номеры +7 (347) 292-11-52, - тине Айбулат Хажин.

Бөгөнгә ҡарата республиканың барлыҡ 96 коллежды ла дистанциялы уҡыуға күскән. Юғары уҡыу йорттары быны 16-18 мартта уҡ эшләне.

Балалар баҡсаларына килгәндә, улар эшләйәсәк, тик сикләү саралары арта. Ата-әсә бинаға инергә тейеш түгел, төркөмдәр даими дезинфекцияланып торасаҡ, саҡ ҡына сирләй башлаған бала өйөнә ҡайтарыласаҡ.

2 апрелдән уҡый башларға кәрәклегенә Башҡортостан Башлығы Радий Хәбиров айырым баҫым яһаны.

- Иғтибар итегеҙ, каникулдар 1 апрелгә тиклем. Балалар өйҙә ултырып, эшһеҙлектән йонсомаһын, эш менән булһын, уҡыһын. Мәғариф министрлығына бар көсөн һалып, бар ижади мөмкинлекте эшкә ҡушып, дистанциялы белем биреүҙе ойошторорға кәрәк. Бик ауыр бурыс, беҙҙә улай булғаны юҡ ине. Технологик яҡтан да әҙер түгелбеҙ. Интернет бөтә ерҙә лә юҡ, ҡайҙалыр белем етмәүе ихтимал. Һеҙҙең бер аҙна ваҡытығыҙ ҡалды, өйрәнегеҙ, әҙерләнегеҙ, - тине Радий Хәбиров.

Фото: mk.ru