Республика хаҡыда яңы туристик сайт

Башҡортостанда яңы туристик сайт менән таныштырҙылар. terrabashkiria.ru порталында рус, итальян, испан, ғәрәп, ҡытай, инглиз һәм немец телдәрендә республика, тәбиғәт ҡомартҡылары хаҡында мәғлүмәт бар.

Сайтты Башҡортостандың туризм министры Салауат Нафиҡов социаль селтәрҙәге сәхифәһендә күрһәтте. «Ғәҙәттә, тыуған көндә ҡотлауҙар һәм бүләктәр алыу ҡабул ителгән. Ләкин мин үҙем бүләк эшләйем. Ҡарағыҙ! Башҡортостандағы туризм тураһында сайт».

Сайттың төп бүлектәре – ҡайҙа барырға, нимә менән шөғөлләнергә һәм нисек барып етергә. Бында яҡынса хаҡтар менән Мәскәүҙән һәм Санкт-Петербургтан Өфөгә килеү ысулдары тәҡдим ителгән. Сайтта туристик маршруттар, шифаханалар, милли аш-һыу, сувенирҙар, шулай уҡ Башҡортостандың баш ҡалаһының күркәм урындары тураһында мәғлүмәт тупланған. Айырым ҡушымтала республиканың туроператорҙары хаҡында мәғлүмәттәр баҫылған.

Хәтерегеҙгә төшөрәбеҙ, декабрь башында visitrb туристик порталы эшләй башланы.

Шуны билдәләп үтергә кәрәк: terrabashkiria.ru — өсөнсө туристик сайт. 19 йылдың мартында туристар өсөн сервис — gotorb.ru интернет-ресурсы асылды.

/«Башинформ» мәғлүмәт агентлығы, Розалиә Вәлиева/.