“Башҡортостанда коронавирус йоҡтороу осрағы юҡ”

Ҡытайҙан киҫкен респиратор инфекция менән ҡайтҡан бөтә граждандар, санитар-карантин контролендә асыҡланған ауырыуҙар һәм 14 көн эсендә медицина ярҙамына мөрәжәғәт иткәндәр мотлаҡ рәүештә башҡаларҙан айырмалы дауаханаға урынлаштырыла. Бөтә тейешле анализдар алына.

Һуңғы мәғлүмәттәрҙән күренеүенсә, Ҡытайҙан ҡайтҡан 31 кешелә киҫкен вируслы инфекция табылған. 24 ауырыуҙа коронавирус асыҡланмаған.

"Республикала йоғошло сирле кешеләр өсөн 1357 урын әҙерләнгән, 615-е ике махсуслаштырылған дауаханала, 742-һе – республика райондарында, - тине һаулыҡ һаҡлау министры Максим Забелин. - Дәүләт дарыуханаларында ай ярымға етерлек вирусҡа ҡаршы препараттар һәм битлектәр тупланған. Ығы-зығы тыуҙырмау өсөн бер ҡулға ундан күберәк битлек бирмәү ҡарар ителде".

Ҡытайҙан ҡайтҡан һәр кем 14 көнлөк обсервация үтә. Улар даими медицина күҙәтеүе аҫтында. Беҙҙә обсервация урыны өсөн “Родник здоровья” профилакторийы билдәләнгән. 37 номерҙа бөтә уңайлыҡтар булдырылған. Әлегә обсерватор буш. Төмән өлкәһендә федерация әһәмиәтендәге тап шундай медицина учреждениеһы бар, ул халыҡ ағымын ҡабул итеп өлгөрә. ”Родник здоровья” ғәҙәттәге режим менән эшләй, кәрәк була ҡалғанда, етәкселек учреждениены 24 сәғәт эсендә бушатырға тейеш.

“Иҫкәртеү эшенә ҡағылышлы саралар дауам итәсәк, тик был ығы-зығы тыуҙырырға тейеш түгел, республикала коронавирус инфекцияһы юҡ”, - ти яуаплы етәкселәр.

Фото:Ckb-rzd.ru

Автор: Дина Арсланова ("Башҡортостан" гәзитенән) https://bash.rbsmi.ru/articles/s-l-m-t-bulayy/Bash-ortostanda-koronavirus-yo-torou-osra-i-yu-116101/