Кушнаренко балалары Бразилия итен ашай...

Кушнаренко районы уҡыусылары Бразилиянан килгән ит ашай икән. Был турала бөгөн Хөкүмәттә үткән оператив кәңәшмә ваҡытында билдәле булды.

– Беҙ Башҡортостан мәктәптәренә балаларға туҡланыу өсөн килгән аҙыҡ-түлекте тикшерҙек. Ниндәй өлөшө Башҡортостандан һәм ниндәйе Рәсәйҙән икәнен ҡараныҡ. Ике район мине ғәжәпләндерҙе. Өфө районы менән Кушнаренко районы мәктәптәре ашханаларында бөтөнләй Башҡортостан тауарҙары ҡулланылмай, – тине Радий Хәбиров.

Ул ғына түгел, Кушнаренко районындағы итте тикшереп, ғәжәп хәлгә тарығандар. Баҡһаң, бында һыйыр ите Бразилиянан килгән икән. Был итте Мәскәү өлкәһенең Люберцы районынан алғандар. Республика етәксеһе иттең составын уҡып ишеттерҙе, унда коллаген аҡһымы һәм туңдырылған һөйәкһеҙ һыйыр ите бар.

– Ошондай итте беҙҙең балаларға ашаталар. Мин был турала тағы күпме тапҡыр ҡабатларға тейешмен? Контроль идаралығы тағы бер тапҡыр тикшереп сыҡһын, – тине Радий Фәрит улы. – Өфө районына шулай уҡ иғтибар итегеҙ. Мәктәптә туҡланыуҙы даими тикшереп торасаҡбыҙ. Был өлкәлә тәртип булырға тейеш.

фото: gorobzor.ru

Автор: Альфия Мингалиева ("Башҡортостан" гәзитенән) https://bash.rbsmi.ru/articles/sotsial-m-s-l/Kushnarenko-balalari-Braziliya-iten-ashay-83828/