40 көн ҡалғас...

35 йәшлек Башҡортостан егете 15 йылдан һуң табылған. Радик Рахманғолов Санкт- Петербург ҡалаһында хеҙмәт иткән.

2004 йылдың 18 июлендә ул һалдат формаһын граждан кейеменә алмаштырып, хеҙмәт иткән часын ташлап китә. Шуныһы ғәжәп: уға тыуған яғына ҡайтырға ни бары 40 көн ҡалған булған. Ҡасҡалаҡтың әйтеүенсә, ул шунда уҡ аҡса эшләй алмағас, частҡа бөтөнләй ҡайтып тормаған. Был йылдарҙа егет Питерҙа йәшәгән. Йәшелсә базаһында, төҙөлөш объекттарында эшләп, тамаҡ туйҙырған. Унан берәү ҙә документ һорамаған.

Шул уҡ ваҡытта дезертирлыҡта ғәйепләнгәндең атай-әсәһе үҙенә урын тапмаған, хатта “Көт мине” тапшырыуына мөрәжәғәт иткәндәр. Быйыл мартта ир танышынан интернет аша бер туған ағаһын табыуын һораған.

Күптән түгел Алкинда егеттең енәйәт эше буйынса аныҡ ҡарар ҡабул сығарғандар. Уны дезертирлыҡта ғәйепләп, өс йылға дөйөм режимлы колонияға иркенән мәхрүм иттеләр.

Теге саҡта киләсәге, атай-әсәһе хаҡында ныҡлап уйлаһа, бындай яҙмышҡа дусар булмаҫ ине. 40 көнгә түҙемлеге етмәгән. Йәл...

Фото:theweek.com

Автор: Венер Исхаҡов