Йүнселдәрҙең проблемалары - иғтибар үҙәгендә

Салауаттың бизнес үҙәгендә Башҡортостан Республикаһында эшҡыуарҙар хоҡуҡтарын яҡлау һорауҙары буйынса вәкил Флүр Әсәҙуллин граждандарҙы ҡабул итте.
- Беҙҙең структураның маҡсаты - эшҡыуарҙарға уларҙың эшмәкәрлегенә бәйле проблемаларҙы хәл итеүҙә ярҙамлашыу. Беҙ республикалағы барлыҡ райондарҙа һәм ҡалаларҙа күсмә ҡабул итеүҙәр уҙғарабыҙ һәм бөтәһен дә тыңларға, ҡулдан килгәнсә ярҙам итергә тырышабыҙ, - тине ул осрашыуҙа.
Флүр Әсәҙуллин билдәләүенсә, йүнселдәр уларға төрлө һорауҙар менән мөрәжәғәт итә. Улар араһында шәхсәндәре лә, системалыһы ла бар. Нисек кенә булмаһын, бизнесҡа бәйле һорауҙарҙы, мәсьәләләрҙе тыңлап беҙ республикалағы дөйөм бизнес үҫешенә бәйле проблемаларҙы хәл итәбеҙ, ҡануниәткә үҙгәрештәр индереү, яңы закон булдырыу буйынса башланғыс менән сығабыҙ, ти эшҡыуарҙар хоҡуҡтарын яҡлаусы вәкил.
Салауатта Флүр Әсәҙуллинға 12 эшҡыуар мөрәжәғәт итте. Ҡабул итеүҙә БР-ҙа эшҡыуарҙар хоҡуҡтарын яҡлау һорауҙары буйынса вәкилдең Салауат ҡалаһы буйынса йәмәғәт ярҙамсыһы Клара Сабирйәнова, “Респект” ҡулланыусылар хоҡуҡтарын яҡлау йәмәғәт ойошмаһы белгесе Татьяна Астахова һәм ҡала хакимиәте вәкиле ҡатнашты. Барлыҡ һорауҙар иғтибар менән тыңланды һәм уларҙы хәл итеү юлдары ҡаралды.