Тел яҙмышы һәр кемде борсорға тейеш

14 декабрҙә, Башҡорт теле көнөндә, “Торатау” конгресс-холында Башҡортостан Башлығы Радий Хәбиров республикабыҙҙың ҡала-район башҡорттары ҡоролтайҙары етәкселәре менән осрашты.

Йыйынды Бөтә донъя башҡорттары ҡоролтайы Президиумы рәйесе, Дәүләт Йыйылышы - Ҡоролтай рәйесе урынбаҫары Эльвира Айытҡолова асты.

Радий Фәрит улы барыһын да байрам менән ҡотланы.
“Башҡорт теленең үҫеше, ҡулланылыу даирәһе өсөн был көн бик мөһим, – тине республика етәксеһе.

- Туған телебеҙҙең яҙмышы һәр беребеҙгә туранан-тура бәйле. Башҡорт теле юғары даирәләргә лә күтәрелде, хәҙер мөһим ултырыштарҙа башҡортса сығыш яһай башлауҙары һәр беребеҙгә мәғлүм”.

Бөтә донъя башҡорттары ҡоролтайы ағзаһы, күренекле шағирә, Шәйехзада Бабич, Шәһит Хоҙайбирҙин исемендәге премиялар лауреаты Лариса Абдуллина үҙ сығышында республикабыҙҙың ҡала-райондарында Башҡорт теле аҙналығы үткәреү, уны бер-береһенә эстафета рәүешендә тапшырыу проектын тәҡдим итте.

Башҡорт ҡоролтайы ағзалары 2020 йылды Башҡорт теле йылы тип иғлан итеү тәҡдимен еткерҙе. Радий Хәбиров был башланғысты ихлас хупланы.

Һөйләшеү фәһемле һәм эшлекле үтте.