Өйөнән бөтә аҡсаны алып сығып киткән

Өфөләге туҡталыштарҙың береһе янында үткенселәр бер әбейгә иғтибар итә. Әбей уларға сәйер күренә. Мәрхәмәтле кешеләр уға ашығыс ярҙам саҡыра. Врачтар уның туғандарын һәм яҡындарын нисек табырға икән тип уйлап торғанда, әбей урынынан ҡуҙғалып сығып китә башлай.Тап шул мәлдә уның кеҫәләренән, яғаһынан аҡсалар ҡойола башлай. Аптырауға ҡалған медиктар аҡсаны иҫәпләй башлай: йәмғеһе 287 мең һум була. Һуңғараҡ әбейҙең ейәне менән бергә йәшәүе асыҡлана. Ейәне магазинға икмәккә сыҡҡан арала әбей ҙә саф һауа һулап керергә ҡарар итә. Үҙе менән өйҙәге бөтә аҡсаларҙы ла алып сығып китә. Әбейҙе аҡсалары менән бергә дауахана машинаһында өйөнә оҙатып ҡуялар.