«Ҡурай даны» премиялары кемгә тапшырылды?

Өфөлә «Ҡурай-ТВ» йыр-моң каналының 10 йыллыҡ юбилейы концертында Милли телепремия тапшырыу тантанаһы уҙҙы.

Тамашасыларҙың тауыш биреү йомғаҡтары буйынса «Ҡурай даны» премияһының 10 номинацияһында замандаштарыбыҙ еңеү яуланы. «Миһырбанлы ғаилә» номинацияһында Баймаҡ районының Йәнйегет ауылынан Фәниә һәм Азамат Ҡарабаевтар, Балаҡатай районынан Әлфинә һәм Кәрим Хәкимовтарҙың ишле ғаиләһе билдәләнә. «Ҡурай даны» телепремияһының береһе Әхәт Мортазинға (үҙе үлгәндән һуң) тапшырылды. «Һөнәр оҫтаһы» номинацияһында тағы бер еңеүсе – Рәхилә Ғәлимйәнова. «Ер кешеһе» номинацияһында Әбйәлил районынан Уразбай Юлдыбаев билдәләнде. «Эшлекле ханым» премияһын Лилиә Сабитова һәм Гөлсәсәк Әлибаева бүлеште. «Йыл меценаты» - Илсур Нәбиуллин, «Ҡул оҫтаһы» - Ләлә Камалетдинова.

«Ижади ғаилә» номинацияһында Зөлфиҙә һәм Ғаяз Муллағәлиевтар билдәләнде. Яҙыусы Айгиз Баймөхәмәтов һәм «Йәшлек» гәзите журналисы Гөлнур Ҡыуатова «Ҡәләм оҫталары» тип танылды.

«Йыл йырсыһы» номинацияһында награданы Айҙар Рәҡипов менән Алмас Хөсәйенов бүлеште. «Иң шәп клип төшөрөүсе» - Батыр Ғәлимов.