Ғүмерҙәрҙе һаҡлап ҡалыр өсөн

Башҡортостанда ашығыс ярҙам бригадаларын планшетлы компьютерҙар менән тәьмин итеү өсөн дәүләт контракты төҙөлдө. Был эш “Һаулыҡ һаҡлау” милли проектының “Һаулыҡ һаҡлау өлкәһендәге берҙәм дәүләт мәғлүмәти системаһы нигеҙендә һаулыҡ һаҡлауҙа берҙәм һанлы контур булдырыу” төбәк программаһына ярашлы тормошҡа ашырылды. Яңы ҡорамалдар 345 “Ашығыс ярҙам” машинаһына урынлаштырыласаҡ. Планшеттарҙың бер өлөшө республиканың медицина учреждениеларына бирелде һәм тест рәүешендә эшләй башланы ла инде.

“Әле махсус тәьмин итеү программаһын, һаҡлау системаһын урынлаштырыу һәм техник мәсьәләләрҙе юлға һалыу эштәре бара. Программистар етешһеҙлектәрҙе һәм барлыҡҡа килгән ҡайһы бер аңлашылмаусанлыҡтарҙы бөтөрөү бурысын атҡара. Мәғлүмәт биреүҙең әлеге төрөнә алдағы йылдың аҙағына тулыһынса күсеп бөтөргә исәпләйбеҙ”, - ти ашығыс ярҙам һәм медицина һәләкәттәре республика станцияһының медицина өлөшө буйынса баш табип урынбаҫары Александр Степанов.

Планшеттар ярҙамында медиктар онлайн режимында шылтыратыу ҡабул итә, юлда ваҡытта уҡ ауырыуҙың сирҙәр тарихын өйрәнә, тәүге медицина документтарын тултыра, дауаханаға ауырыуҙың хәле, кәрәк буласаҡ ярҙам тураһында хәбәр ебәрә тора.

Дауаханалар үҙ сиратында алынған мәғлүмәттәргә нигеҙләнеп, алдан уҡ ауырыуҙы ҡабул итергә әҙерләнә. Был киҫкен осраҡтарҙа кеше ғүмерен һаҡлап ҡалыуға мөмкинлек бирә.

#Миллипроекттар