"Мостай менән осрашыуҙар" күргәҙмәһе асылды

Ошо көндәрҙә баш ҡаланың И.В. Нестеров исемендәге Башҡорт художество музейында “Мостай менән осрашыуҙар” фотокүргәҙмәһе асылды.

Башҡортостандың халыҡ шағирына арналған фотоһүрәттәр олуғ әҙиптең тормош һәм ижад юлын сағылдыра. Проекттың авторы - Рәсәйҙең һәм Башҡортостандың атҡаҙанған мәҙәниәт хеҙмәткәре Вячеслав Стрижевский. Мәшһүр әҙипте ул 1965 йылда уҡ фотоға төшөрә башлаған. Күргәҙмәне асыу тантанаһында Мостай Кәрим исемендәге фондтың етәксеһе, шағирҙың ҡыҙы Әлфиә Кәримова, Башҡортостан Башлығының ҡатыны Каринэ Хәбирова һәм башҡа рәсми вәкилдәр, сәнғәт, мәҙәниәт, дин әһелдәре ҡатнашты.

Вячеслав Стрижевский был күргәҙмәне ойошторорға ярҙам иткәндәргә рәхмәтен еткерҙе.

- Алдыма ҡуйған төп маҡсатым бөйөк замандашыбыҙҙың, яҡташыбыҙҙың, дуҫыбыҙҙың, Башҡортостандың халыҡ шағирының ҡабатланмаҫ образын тергеҙеү һәм һаҡлау ине, - тине ул.

Автор фотоларҙы ҡырҡ йылдан ашыу ваҡытта туплаған. Мостай Кәримдең тыуыуына 100 йыл тулыу айҡанлы асылған экспозиция уникаль фотоларҙан тора. Күргәҙмә ай аҙағына тиклем эшләйәсәк.

("Башҡортостан" гәзитенән)